إيه اللي هيحصل في الدولار والدهب بعد قرار التثبيت

ليه البنك المركزي المصري قرر نهاردة يثبت سعر الفايدة وإيه تأثير ده على الدولار والدهب في الايام الجاية وايه المفاجآت المنتظر تحصل بعد قرار المركزي.. خليكم معانا وهنعرف كل التفاصيل في هذا التقرير.

النهاردة الخميس لجنة السياسة النقدية قررت تثبيت سعر الفايدة الرئيسية على الجنيه، في أول اجتماع للجنة بعد الاجتماع الاستثنائي اللي عقد في 6 مارس اللي فات ورفع فيه المركزي سعر الفايدة بواقع 600 نقطة أساس.
وقررت اللجنة بالإبقاء على أسعار الفايدة لليلة واحدة عند مستوى 27.25% للإيداع 28.25% للإقراض.
والحقيقة قرار المركزي النهاردة مكنش مفاجأة بالعكس معظم التوقعات كانت بتقول تثبيت لأنه هو القرار الانسب دلوقتي ومش منطقي ترفع الفايدة وصعب تنزلها دلوقتي رغم فيها توقعات قالت ممكن المركزي ياخد قرار التخفيض بعد تراجع نسب التضخم واللي بتتحكم في تحديد سعر الفايدة بشكل كبير.

طب ايه تأثير ده على الدولار والدهب ياترى ودول أكتر حاجتين بيتأثرو بالفايدة وبيهموا الناس جدا.. شوف حضرتك عادة خفض الفايدة أو تثبيتها بيكون رسالة طمأنة عن التحسن فى الاوضاع وبالتالى الدنيا بتهدا شوية والاسواق بتبدأ تاخد نفسها وده بيكون ليه تأثير قوى على  استقرار سعر الدهب والدولار في حالة التثبيت تحديدا.
وعشان نفهم تأثير تثبيت سعر الفايدة على الدهب أولا فلازم نعرف إن القرار هيضيف مزيد من الاستقرار في الفترة الجاية على اسعار المعدن الأصفر محليا لفترة على الاقل لأن الدهب عادة سعره بيزيد لما المركزي يقرر خفض الفايدة لأنه في الحالة دي أصحاب المدخرات بيتحولوا للاستثمار في الدهب كأكتر وعاء استثماري من ناحية المكسب لو البنك المركزي حفض الفايدة وده طبعا معناه إن مكاسبهم من الفايدة من البنوك هتقل فيبتدأو يدورا على استثمار تاني يكسبو منه أكتر وهنا الدهب بيكون الحل المثاللي.
لكن خلونا نأكد بردو إنه مع تثبيت سعر الفايدة فيه حاجات تانية بتأثر على الصاغة زي الأسعار العالمية واللي بتعيش قفزات قياسية على مدار الأيام اللي فاتت ومرشحة للزيادة تاني بسبب تصعيد الأحداث بين أمريكا والغرب من ناحية وبين روسيا والصين من ناحية تانية والصين تحديدا عاملة أزمة في سوق الدهب العالمي لأن البنك المركزي بتاعها بيتشتري كميات كبيرة من الدهب عشان يتحوط ضد القرارات الامركية من ناحية ويقلل الاعتماد على الدولار في احتياطاته من ناحية وفيه بنوك مركزية كتير حولين العالم فكرت بنفس الشكل والنتيجية سنة 2023 كانت سنة قياسية في مشتريات البنوك المركزية العالمية بحوالي 1081 طن وده رقم محصلش قبل كده وده معناه زيادة الطلب على المعدن النفيس وبالتالي زيادة سعره عالميا وأكيد طبعا هيزيد عندنا في مصر لأن السوق مرتبط بالسوق العالمي.
طيب ايه تأثير سعر الفايدة على الدولار في الايام الجاية.. شوف حضرتك دلوقتي سعر الدولار اللي بيحدده العرض والطلب بعد تبني المركزي لسياسة تحرير سعر الصرف بشكل كامل ومبقاش يدخل في سعره وشفنا ازاي الدولار مرات بينزب ومرة بيزيد حسب قانون السوق الأزلي وهو زي ما قلنا العرض والطلب وبالتالي مفيش تثبيت سعر الفايدة هيدي مزيد من الاستقرار في سوق الصرف بشكل عام لأنه محصلش مفاجأت في المركزي تخلي سوق الدولار يتحرك بشكل مش طبيعي.