ارتفاع تاريخي في الطريق.. تحذير عاجل من تجار الدهب

ياترى الدهب رايح على فين وأيه حكاية الأرتفاع التاريخي اللي جاي في الطريق وإيه هو أنسب وقت اشتري فيه، وإيه حكاية التحذير اللي اطلقته شعبة وخبراء الدهب للمواطنين.. تعالوا نشوف كل اللي حصل في الفيديو ده.

شوف حضرتك كل خبراء الدهب تقريبا جوة مصر وبره متوقعين أو شبه متأكدين إن أسعار الدهب رايحة في العالي وهتحقق قفزات تاريخية وده بدأ يحصل فعلا وعشان كده خبراء والجواهرجية شايفين إن ده هو الوقت المناسب لو عاوز تستثمر في الدهب لان الأسعار هتضرب في العالي خلال الشهور الجاية ونصحو كمان أي حد معاه دهب يستنى عليه شوية.
ليه التجار متوقعين ارتفاع كبير في سعر الدهب.. لانه ببساطة سعر الدهب وسوق المعدن الأصفر مرتبط أساسا بالأحداث العالمية وحالة الاستقرار الدولي والصراعات وأي توتر بيحصل بينعكس فورا على سوق الدهب العالمي وشفنا امبارح ازاي الدهب حلق في مستوريات تاريخية جديدة بعد سقوط طارة الرئيس الإيراني وسجل سعر الدهب الفوري ارتفاع خلال تداولات الساعات اللي بعد الحادث، بنسبة 1.3% وسجل أعلى مستوى تاريخي عند 2450 دولار للأونصة ليتخطى الدهب بهذا قمته السعرية الأخيرة عند 2431 دولار للأونصة وده معناه إن الدهب بيقرب على أكبر مستوى من ناحية التوقعات وهو 3 الاف دولار، نتجية استمرار الأزمة الروسية الأوكرانية واتساع الصراع لعقوبات اقتصادية جديدة وفي نفس الوقت الوصع في المنطقة عندنا ولأن كل المشكلات دي مستمرة يبقي الدهب هيفضل في الطالع.

طيب ايه النصيحة اللي  شعبة الدهب باتحاد الصناعات قالتها للمواطنين لو حابين يستثمروا في الدهب.. شوف حضرتك الشعبة طلبت من المواطنين مايمشوش ورا الاشاعات ومايصدقوش أي حد بيحلل ويشرح ويتوقع اللي هيحصل في سوق الدهب لو هو مش متخصص ودا بعد حالة الفوضى اللي حصلت على منصات التواصل الاجتماعي والشوشيال ميديا وانتشار توقعات ملهاش علاقة بسوق الدهب وده أثر على ناس كتير وخلاهم ياخدو قرارات خطأ بالبيع أو الشراء.
الخلاصة إن كل الظروف بتقول إن الدهب سعره هيزيد جدا في الأيام الجاية عشان الأسباب اللي قلنا عليها وضيف عليهم زيادة مشتريات البنوك المركزية للمعدن الأصفر للتحوط ضد هبوط أسعار الفايدة الأمريكية بعد توقعات بتقول إن بنك الاحتايطي الفدرالي الأمريكي هيتخلى عن سياسة رفع الفايدة ودي أكتر حاجة هتخلي أسعار الدهب تزيد بشكل كبير.