أبوعلاء عامل قلبان في الشرقية.. إيه حكاية مستريح الدولار اللى استولى على مليار جنيه

يا ترى ايه حكاية أبوعلاء اللى عامل قلبان فى محافظة الشرقية؟ وازاى قدر يستولى على مليار جنيه من أهالي فاقوس ؟وايه حكاية الدولارات اللى كان بيشغلها؟ وهل كده فلوس الناس راحت ولا ممكن يرجعها ؟ وازاى واحنا فى 2024 لسه فيه ناس بتغامر وتحط فلوسها مع ناس مش مضمونة؟

حرفيا الدنيا بقالها كام يوم مقلوبة فى محافظة الشرقية وتحديدا فى مركز فاقوس .. الناس نامت وصحيت على خبر هز الدنيا .. بعد ما تم الاعلان عن استحواذ رجل أعمال شهرته أبو علاء بيمتلك مجموعة من المحلات على ما يقرب من مليار جنيه من الأهالى فى مركز فاقوس والقرى والنجوع التابعة للمركز

ووفقا لشهادات الضحايا أبو علاء ده كان بياخد فلوس من الناس ويشغلها ويديهم فوايد شهريه عليها..و معظم الفلوس دى كانت داخله فى شراء الدولار وبيعه بأسعار عاليه لما كان الدولار سعره فوق ال 70 جنيه .. ومش بس الدولار لا أبو علاء كان دايس فى كل العملات تقريبا يعنى دولار ماشي استرليني ما يضرش يورو شغال دينار كويتي وريال سعودي ما يضرش

الغريبة ان ابو علاء كان بيضارب فى الدولار.. والناس اللى دافعين فلوس كانوا عارفين كده كويس..  بس المكاسب عمت عيونهم عن الغلط لأن ده كان خارج القانون ومجرم وأدى إلى انهيار الأقتصاد وارتفاع جنونى لأسعار السلع والمنتجات فى السوق المصرى وحالة الغلاء الشديد اللى احنا بنعانى منها لدلوقتي.

طبعا فيه ناس كانت بتدارى على الموضوع وتقول انه كان بيستثمرها فى مشاريع وده ماحصلش لأن فاقوس كلها عارفه طبيعة شغله وانه بيتاجر فى الدولار.

المهم شكل ابوعلاء اتعرض لمشكله فى فلوس الناس وساب البلد وهرب ودى المعلومات المتداوله بين الناس والمبالغ اللى خدها مبالغ كبيرة ناس بتقول 900 مليون وناس بتقول مليار جنيه والمحلات بتاعته فى فاقوس كلها اتقفلت والأشاعات ملت البلد كلها عن هروبه خارج مصر.

طب هل فلوس الناس كده ضاعت عليهم ؟

للأسف بنسبة كبيرة الناس دي كلها خسرت فلوسها والطمع ملا عينهم ومفكروش ان اللى بيعملوا ابو علاء واللى زيه مش قانون وبيدمر اقتصاد البلد وان فيه طرق كنتير قانونية يستثمروا فيها فلوسهم ومضمونة ومحمية زي شهادات الاستثمار فى البنوك أو شراء الدهب او العقارات بالاضافة لمشروعات كتيرة ممكن تحقق ارباح خيالية والاستثمار فيها آمن

واحنا هنا في بانكير حذرنا كتير من المستريحين اللى بيظهروا تحديدا فى المحافظات الريفية واللى بيستغلوا جهل بعض البسطاء وبيغروهم بالارباح الخيالية ويسطوا على فلوسهم وبعدها يهربوا

وقولنا لحضراتكم عن طرق استثمار كتير آمنة ومضمونة وفلوسك فيها محمية عشان ما تقعش فريسة لأبوعلاء وغيره من المستريحين اللى بيعملوا ثروات بالملايين ولما المركب تقرب تغرق بيخلعوا ويسيبوا الناس محتاسة