لو عاوز تستثمر في الدهب ولا الشهادات.. استنى لغاية الخميس.. هنقولك ليه

معاك فلوس زيادة وبتفكر تستثمر في الدهب ولا شهادات الادخار أو حتى في العقارات ومحتار تشغلها في أي حاجة فيهم.. اقرأ التقرير  ده للاخر وهنقولك امتي وليه..

وشهادات الادخار والعقارات غالبا هما الاستثمارات الشعبية اللي أغلب المصريين بيشغلوا فلوسهم فيها والحقيقة التلاتة استثمار مربح وناجح ومضمون جدا لكن الاستثمار في كل نوع فيهم ليه مزاياه وعيوبه والأهم غنك تختار التوقيت الصح عشان تستثمر في واحدة منهم.
عامة لو بتفكر تستثمر في الدهب أو شهادات الادخار اللي في البنوك تحديدا فضروري جدا تستنى لغاية يوم الخميس الجاي لأن ده اليوم اللي هتجتمع فيه لجنة السياسة النقدية بالبنك المركزي المصري وهتحسم فيه مصير سعر الفايدة على الجنيه.. طيب ايه علاقة سعر الفايدة بالشهادات والدهب.. أكيد طبعا فيه علاقة مباشرة  خاصة مع شهادات الادخار لأن ده السعر اللي هيتحدد بيه سعر فايدة الشهادات بعد كده واللي هيحدد في نفس الوقت لو البنوك هتطرح شهادات جديدة تقدر تستثمر فيها ولا هتكتفي باللي موجود وكمان كلنا سمعنا إن البنك الأهلي وبنك مص بيفكروا أصلا يخفضوا سعر فايدة الشهادات اللي موجودة أصلا وممكن ده يحصل لو المركزي مثلا نزل أو خفض سعر الفايدة في اجتماعه الخميس الجاي.

وبخصوص الدهب فطبعا سعر الفايدة يوم الخميس هيكون ليه تأثير كبير على سعر المعدن الأصفر وده لان الو المركزي نزل السعر ده معناه الدهب سعره هيزيد لان الطلب عليه هيزيد لأن الناس مش هتروح تستثمر في الشهادات وهتحط فلوسها في الدهب المضمون وهكذا كل سوق مرتبط بالتاني وصعب تفصل حاجة عن التانية.
طيب بالنسبة لقرار المركزي فياترى هيخفض ولا هيثبت أو هيرفع سعر الفايدة.. شوف حضرتك محدش يقدر يجزم لكن مؤشرات التضخم بتقول إن فيه احتمال كبير إن المركزي يخفض سعر الفايدة بسبب تراجع معدلات التضخم في البيانات الأخيرة وفيه رأي تاني بيرجج تثبيط سعر الفايدة لغاية ما معدلات التضخم تنزل أكتر من كده.
طيب ياسيدي لو المركزي خفض سعر الفايدة مثلا 150 نقطة أساس زيي ما قال البنك الأمريكي جولدمان ساكس النهاردة مين اللي هيستفيد.. في العموم اكتر ناس هتستفيد لو البنك المركزي نزل سعر الفايدة على الإيداع والاقتراض أصحاب الشركات والافراد اللي محتاجين تمويل أو قروض طبعا لأن ده معناه هيدفعوا فوايد أقل على القروض وبالتالي القرض مش هيبقى مكلف لكن زي ما قلنا في الناحية التانية مش هيكون فيه شهادات ادخار جديدة بسعر أعلى وكمان الدهب سعره هيزيد للأسباب اللي قلنا عليها قبل كده.