ليه البنك المركزي بيشتري كميات كبيرة من الدهب.. مفاجأة هتصدمك

يا ترى ليه البنك المركزي فى الفترة الأخيرة بيشترى كميات كبيرة من الدهب؟ وايه ترتيب مصر عربيا فى قائمة الدول الأكثر شراءا للدهب ؟ وايه علاقة اللى بيحصل بأزمة شح الدولار ؟ وايه اخر تطورات حجم الاحتياطي النقدي ؟

في آخر تقرير لمجلس الذهب العالمي حل البنك المركزي المصري في المركز التالت بين أكبر البنوك العربية والأفريقية في امتلاك الدهب خلال 2023 رغم أن فى السنة دي مصر عانت من أزمة شح للعملة الأجنبية

تقدير مجلس الذهب العالمي اللي نشرت من أيام بتقول أن البنك المركزي  بيحتفظ باحتياطي من الدهب يقدر بحوالى 126 طن ليأتي في المركز التالت عربيا خلف المتصدر البنك المركزي الجزائري 174 طن وصاحب المركز التاني البنك المركزي الليبي147 طن

ووفقا لتقدير مجلس الذهب العالمي فعلى الرغم من شراء البنوك المركزية كميات كبيرة من الدهب من 2022  ولحد دلوقتي فالطلب على الدهب مش هينخفض قريب حتى بعد الارتفاعات الكبيرة مؤخرا فى اسعار الدهب هيفضل ملاذ آمن لكتير من المستثمرين والبنوك المركزية حول العالم.

طب ليه البنك المركزي بيشترى الكميات الكبيرة دي من الدهب؟

بص يا سيدي احتياطي الدهب لدى البنك المركزي بيعتبر بشكل عام أحد مكونات احتياطي النقد الأجنبي وكل ما تمكن المركزي من زيادته من خلال توريد مناجم تابعة للإدارة العامة للثروة المعدنية أو من خلال عقود خارجية للبنك المركزي.. كل ده بيزيد من الاحتياطيات الأجنبية.

ومع نهاية مارس اللى فات ارتفعت أرصدة الدهب لدى البنك المركزي إلى ما يزيد على ال  424 مليار جنيه، مقابل 256.599 مليار جنيه بنهاية فبراير2024.

وخد بالك احتياطيات الدهب بشكل عام هي صمام أمان موثوق بيه للبنوك المركزية لمواجهة حالات الطوارئ والأزمات وممكن استخدامه كمان لسداد الديون الخارجية للدولة والالتزامات التانية.. لأن المعادن الثمينة زي الدهب بتتميز بسهولة وسرعة التحويل إلى العملات الأجنبية وعشان كده هي عنصر مهم في النقد الأجنبي ومفضل لدى غالبية البنوك المركزية في العالم

طب هل مصر بس اللى مهتمة بشراء الدهب فى مكونات الاحتياطي بتاعها ؟

مش مصر بس هى اللى بتعمل كده مؤخرا تقريبا معظم البنوك المركزية حول العالم وفيه بنوك مركزية كبير زي المركزي الصيني والهندي والتركي وغيرهم بيشتروا كميات كبيرة جدا من الدهب فى اطار التخلى عن الدولار وتقليل الاعتماد عليه فى الاحتياطيات النقدية