الجنيه هو إللي بيتحكم في سعر الدولار.. تعالى نقولك إزاي

 
 
أكيد مصدقتش العنوان بتاع الفيديو.. لكن دي الحقيقة.. تعالى هنقولم إزاي ده بيحصل وليه الدولار مش قوى في نفسه.. وهنعرف كمان مصير المعركة الشرسة بين الدولار و الجنيه في الفترة الجاية خليكم معانا للآخر وهتلاقوا مفاجآت في الفيديو.

 
لو فاكر أن ارتفاع سعر الدولار هو بسبب قوته فتبقى غلطان لكن السبب الأساسي هو في ضعف الجنيه أو اي عملة قدامه في العالم وموقف العملة دي هو اللي بيحدد سعر الدولار في بلدها يعني الرك في النهاية على قوة الجنيه أو العملات التانية اللي خلت الدولار وحش محدش قادر عليه وبيعتمد في قوته كمان على مدى الطلب عليه أمام العملة الوطنية.
وعشان نشرح لحضرتك بالتفصيل هناخد مثل لقوة الدولار قدام الجنيه المصري ولو دورنا على الأسباب هنلاقيها بتنحصر في قوة الطلب على الدولار والاعتماد الكبير عليه ومدى المعروض منه وعشان كده سعره ارتفع لمستويات قياسية مع أزمة تقص الدولار في 2023 بعد هروب الاستثمارات الساخنة وظهور المضاربة عليه والنتيجة الجنيه ضعف وفقد نص قيمته تقريبا في ذروة الأزمة وده أدى الفرصة للدولار يطيح في السوق.. لكن لو تخيلنا العكس هو اللي حصل والدولة كان اعتمادها قليل على الدولار أو عندها موارد ضخمة منه في الحالة دي سعره هيكون في الأرض مقابل الجنيه والي قيمته ساعتها هتزيد بشكل كبير.
طيب ليه بنقول الجنيه المصري هو اللي بيتحكم في سعر الدولار.. عشان لو الدولة عندها موارد كبيرة من العملة الأمريكية وبتصنع مثلا وتصدر زي دول جمبنا ب300 مليار دولار في السنة في بند واحد لموارد العملة كان زمان الجنيه المصري محصن وفي حتة تانية وهو اللي بيتحكم في الوحش الأمريكي مش العكس يعني ببساطة الأمر مرهون بقوة اقتصادك وتصديرك واستيرادك ومواردك من العملة الصعبة وده اللي بتعمله الدولة دلوقتي واللي عندها خطط وشغالة عليها بالفعل وبدأت بشايرها تظهر في تعظيم موارد الدولار عشان توصل في النهاية لوفرة العملة الأمريكية وبالتالي رفع قيمة الجنيه وغير كده هيفضل الدولار في زيادة.
طيب ايه مصير الجنيه والدولار الفترة الجاية.. شوف حضرتك كل المؤشرات بتقول إن الأيام الجاية هي ايام الجنيه المصري لأن الدولة عندها خطط زي ماقلنا لتوفير موارد ضخمة من العملة الخضراء مش هتقل عن 300 مليار دولار في السنة زي ما قال الدكتور مصطفى مدبولي رئيس الحكومة وحسب العرض والطلب ساعتها الجنيه المصري هو اللي هيكون صاحب الكلمة في تحديد سعر الدولار والصرف لباقي العملات .
طيب الدولة هتوصل لرقم 300 مليار دولار ازاي ومنين.. زي ما قلنا قبل كده الحكومة وبتعليمات مباشرة من رئيس الجمهورية اقرت خطط وبتنفذها بالفعل في أكتر من اتجاه زي مثلاً ترشيد الاستيراد مقابل زيادة التصدير وتوطين الصناعة ولو تابعنا هنلاقي ارقام التصدير بتزيد كمان ملف  الاستثمار المباشر أرقامه بتزيد بشكل كبير وشفنا حجم الصفقات المعلن عنها بعد صفقة رأس الحكمة والكلام على صفقات الاستثمار المليارية في الهيدروجين الاخضر وصفقات رأس جميلة والجلالة والعاصمة الإدارية والعلمين الجديدة والساحل الشمالي كله وصفقات منطقة الصعيد والغردقة ودي مشروعات بمليارات الدولارات ومثلا مصر بتعمل مشروع واحد في قطاع الهيدروجين ب21 مليار دولار غير المناطق الصناعية الجديدة واللي بتعملها الصين وتركيا والهند وتوطين الصناعات الضخمة زي صناعة السيارات والقطارات والالات وكفاية نعرف إن منطقة قناة السويس الاقتصادية بتستهدف جذب ألف شركة صينية مرة واحدة ودا غير مشروعات الاكتفاء الذاتي من الزراعة وكل ده بيقول إن تدفقات الدولار هتكون ضخمة وبالتالي انخفاض سعره مقابل ارتفاع مواز للجنيه المصري