الانفراجة الأكبر في أزمة الدولار.. 61 مليار دولار تنعش خزينة البنك المركزي
أى دولة فى العالم بتحاول بكل الطرق ترفع الاحتياطي النقدي بتاعها لأعلى سقف ممكن ومفيش دولة عاوزة تكبر او تأمن احتياجات شعبها الا وبتكون مهتمة بشكل كبير بتعظيم احتياطياتها من العملة الأجنبية .. وهنا فى مصر ورغم كل الازمات اللى عيشناها فى السنين اللى فاتت الا ان الاحتياطي بتاعنا كان دايما فى الحدود الآمنة .. ومع بداية التعافى من أزمة شح العملة الحكومة والبنك المركزي حاليا شغالين على رفع قيمة الاحتياطي والوصول بيه الى مستويات قياسية محصلتش قبل كده.. فيا ترى ده ممكن يحصل ازاى ؟ وممكن حجم الاحتياطي بتاعنا يوصل لفين؟ وايه الفلوس اللى هتدخلنا من بره ممكن تساعد فى زيادة حجم الاحتياطي النقدي؟
فى الفترة الأخيرة زادت بشكل واضح حالة التفاؤل بشأن مستقبل الاقتصاد المصري ورفعت مؤسسات تمويل دولية تقديراتها لاحتياطي النقد الأجنبي لمصر لتقفز التوقعات فوق حاجز 61 مليار دولار خلال ال 5 سنين الجاية خصوصا مع التزام مصر بتحرير سعر الصرف بشكل كامل ومستدام.
وفى آخر تقاريره أعلن البنك المركزي ارتفاع احتياطي النقد الأجنبي خلال الشهرين اللى فاتوا بمقدار 6 مليار دولار فى مارس وأبريل ليصل إلى 41.1 مليار دولار لأول مرة من سنتين.
وكان البنك المركزي المصري أعلن قبل شهرين وتحديدا في 6 مارس تحرير سعر صرف الجنيه مقابل العملات الأجنبية والسماح بتحديد قيمة الجنيه مقابل العملات الأجنبية حسب العرض والطلب.
وتزامن ده مع إعلان المنظمات والصناديق الدولية والإقليمية تخصيص 57 مليار دولار لمصر خلال ال 4 سنين الجاية
وبيتوقع صندوق النقد الدولي ارتفاع احتياطيات مصر من النقد الأجنبي إلى 45.8 مليار دولار في السنة المالية المقبلة 2024-2025… وممكن كمان يرتفع أكتر من كده ويوصل الى 61.7 مليار دولار أمريكي في السنة المالية 2028-2029،
تقارير الصندوق كشفت ان هيئة المجتمعات العمرانية الجديدة هتبيع 15 مليار دولار من صفقة رأس الحكمة إلى البنك المركزي مقابل الجنيه للاحتفاظ بيها كاحتياطي من النقد الأجنبي وده هيكون عامل مهم في زيادة الرصيد المتوقع.
واستلمت مصر الشريحة الأولى من صفقة رأس الحكمة بقيمة 10 مليار دولار من الامارات فى مارس اللى فات.
فى الوقت اللى توقع فيه بنك جي بي مورجان الأمريكي ارتفاع احتياطي مصر من النقد الأجنبي بمقدار 16.2 مليار دولار ليصل إلى 49.8 مليار دولار خلال السنة المالية 2024/2025.
وبيتوقع البنك زيادة قدرها 2.6 مليار دولار لتصل إلى 52.5 مليار دولار في السنة المالية التالية 2025-2026.
أما بنك غولدمان ساكس فيتوقع ارتفاع إجمالي احتياطيات مصر من النقد الأجنبي إلى أكتر من 61 مليار دولار بحلول نهاية 2027 مع تحويل ودائع دول مجلس التعاون الخليجي لدى البنك المركزي المصري إلى استثمارات مباشرة في مشروعات جديدة.
وكالة فيتش للتصنيف الائتماني توقعت هي كمان ارتفاع إجمالي الاحتياطي الأجنبي لمصر بمقدار 16.2 مليار دولار ليصل إلى 49.7 مليار دولار في 30 يونيو 2024 .
وتوقعت الوكالة فى تقرير ليها عن مصراستمرار احتياطي النقد الأجنبي في الزيادة بحلول العام المالي 2024-2025 ليصل إلى 53.3 مليار دولار .
