الودايع قصاد المشروع.. حقيقة اللي بيحصل في رأس جميلة

إيه حكاية صفقة رأس جميلة وهل فعلا الدولة هتدي المشروع للسعودية مقابل اسقاط الودايع ومين من مصلحته يردد الكلام ده.. تعالو نشوف ايه الحكاية

في الساعات الأخيرة طلعت أخبار بتقول إن السعودية قدمت عرض بالتنازل عن ودائعها في البنك المركزي المصري، مقابل إتمام صفقة رأس جميلة والاستحواذ على عدد من الشركات الحكومية. وقالت كمان إن الصفقات في العرض السعودي بتشمل مدينة رأس جميلة، وشركة سيرا للتعليم وهي شركة متخصصة في قطاع الخدمات التعليمية، تقوم بتشغيل 27 مدرسة مملوكة لها، إضافة إلى 5 شركات أخرى في قطاعات مختلفة.
وطبعا الأخبار دي محدش نشرها غير مواقع الإخوان على المنصات الإخبارية والتواصل الاجتماعي واللي صورت الصفقة المزعومة على إن مصر باعت أرضها مقابل الديون أو الودايع وطبعا ده كلام هبد في هبد لان مصر دولة مؤسسات ولو فيه صفقة هيتم الإعلان عنها في مؤتمر علني ومش هتم في السر زي ماحصل كده في الإعلان عن صفقة رأس الحكمة مع الإمارات وكل حاجة كانت في النور واتقالت كل التفاصيل وبالأرقام، وطبعا واضح كده إن الذباب الإلكتروني لأهل الشر حس إنه فاضي فقرر يعمل ترند مفبرك ويقول أخبار مش حقيقية ومش أكيدة.
لكن في الوقت نفسه فيه فعلا مفاوضات على مشروع رأس جميلة لكن لسه مخلصتش بشكل نهائي ومفيش حد يقدر يقول تفاصيل وجايز جدا الودايع السعودية في مصر تدخل ضمن الصفقة ودي مش عيب لأنها في الاخر الديون واسقاطها يعني مش بتخفف ديونها لكن مش كل دي التفاصيل لأن إعلام الاخوان اشتغل على طريقة لاتقربوا الصلاة ومقالش إن اسقاط الديون جزء من الصفقة المنتظرة.

طيب بمناسبة الودايع هي السعودية ليها كام في البنك المركزي.. شزف حضرتك الودايع السعودية بقيمة 10.3 مليار دولار وهي بتتنوع ما بين 5.3 مليار دولار ودايع متوسطة وطويلة الأجل، و5 مليارات دولار ودايع قصيرة الأجل... طيب ليه السعودية تحديدا هي المتحمسة لمشروع راس جميلة.. وده طبعا عشان المنطقة مواجهة للشاطيء السعودي وأقرب نقطة للمملكة في المنطقة دي وإن تحويلها لمنتجعات سياحية هيوفر منتجع قريب جدا للسعوديين بدل ما يسافرو تركيا ولا تايلاند وده طبعا هيوفر موارد دولارية ضخمة لمصر والسعودية لان الصفقة هتكون بالشراكة ومصر هتضمن إيرادات وعوايد زي ما حصل في صفقة رأس الحكمة.
الخلاصة إن الكلام على رأس جميلة مخلصش والحكومة هتوصل لأفضل عروض لاستغلال المنطقة وتحويلها لمنتجعات عالمية ومركز جذب سياحي جديد جمب شرم الشيخ، وغير كده كله فبركة وأخبار تحريض معروفة جدا مصدرها مين.