استمرار نزيف الدولار أمام الجنيه.. مفاجآة الأيام الجاية
![الدولار]( /UploadCache/libfiles/5/4/600x338o/622.jpg)
ياترى ايه سر انخفاض الدولار على مدار أسبوع كامل وإيه مصيره في الأيام الجاية وهل فيه مفاجآت تانية في الطريق .. كل دي أسئلة بخلاف تفاصيل تانية كتير هنكشفها لكم .
الدولار وما أدراك من الدولار ياترى حد كان يصدق لو قلناله في من كام شهر إن الدولار ممكن سعره ينزل وإن السوق السودا هتنتهي وإن الجنيه هيرجع يرفع تاني كان هيفتكرك مغيب عن الواقع لكن ده بيحصل دلوقتي فعلا والدولار بيتراجع بقوة قدام الجنيه وخلاص على مشارف 46 جنيه بعد ما وصل 50 بعد قرار المركزي بالتعويم ولسه كمان فيه زحام على فروع شركات الصرافة لتبديل الدولار وباقي العملات بالجنيه المصري وبنشوف كل اليوم الحصيلة بتزيد ازاي.
طيب اللي قلب حال الدولار وخلاه يضعف قدام الجنيه.. طبعا الأسباب كلها معروفة ومش هنضيف حاجة غير إن بجانب التدفقات الدولارية الضخمة بعد راس الحكمة وصندوق النقد وأوروبا وغيرها، مصر بقت عندها خريطة عمل للتعامل مع تقلبات العملة الأمريكية واتبعت خطة قاسية لترشيد استخدام الدولار كان منها ترشيد الاستيراد لأبعد حد وإن مفيش دولار يتصرف في غير مكانه وغير السياسة المرنة والمحترفة للبنك المركزي والليي بيخترع مبادرات خارج الصندوق عشان يوطن الدولار في البنوك.
ده بالنسبة اللي حصل نهاردة وفي الأيام الأخيرة.. طيب هل ياترى الدولار هيفضل ينزل ولا دي فترة مؤقتة وهيرجع فيها تاني أقوى.. شوف يافندم موضوع إنك تشيل هم الدولار هيبقي بكام بكرة ده انتهي لان مفيش سوق سودا ولا مضاربين هيحددوا سعره لكن فيه سوق صرف حر بيحكمه العرض والطلب ومفيش حاجة غير كده وخلاص عصر الفوضى في سوق الصرف انتهي والجنيه بقي زي أي عملة في العالم سعره بيحدده السوق مش الحكومة ولا البنك المركزي.
وكل الأرقام والبيانات والتدفقات الدولارية سواء من المصادر الخمسة الطبيعية للبلد أو من مصادر التمويل التانية بتقول إن الدولار لسه هيفقد حوالي 8 جنيه من سعره الحالي وهيستقر عند 39 و40 جنيه وده اللي قالته أكبر مؤسسات المال في العالم لأن الموضوع خلاص مبقاش صعب وبيحدده السوق وبالعرض والطلب تقدر تعرف الدولار رايح على فين.
لكن فيه حاجة مهمة جدا مش واخدين بالنا منها وهي إن انخفاض أسعار الدولار بتعني زياادة قيمة الجنيه والقوة الشرائية بتاعته يعني كل ماتلاقي الدولار نزل في البنك يبقي اعرف إن الجنيه اللي في جيبك قيمته زادت ولسه هتزيد وده هتحس بيه بعدين لما الأسعار تنزل وتقدر تشتري بالجنيه اللي كنت تشتريه زمان وفي الأخر ده اقتصاد وعرض وطلب وإنتاج وتصدير وأسواق ومفيش حاجة فيه بتستخبة ولا تداري.