تعديل جديد في خطة تخفيف الاحمال.. شوف الكهرباء هتقطع عليك الساعة كام

النهاردة وزارة الكهرباء والطاقة المتجددة، أعلنت عن تعديل خطة تخفيف الاحمال علي مستوي الجمهورية، وقالت انها هتبدا من بكرة تنفيذ جداول جديدة لقطع الكهرباء علي المحافظات.. يا تري المواعيد الجديدة لقطع التيار هتبدا من الساعة كام.. وهل فعلا هنوصل لـ 4 ساعات قطع كهربا

خطة تخفيف الاحمال علي الشبكة القومية للكهرباء واحدة من الحاجات اللي بتشغل بال اغلب الشعب المصري خصوصا ان بتتطبق علي الكل يعني مفهاش خيار وفاقوس، والكهرباء بتقطع علي الكل الغني زي الفقير، ودي بدأت بسبب انخفاض امداد الوقود والمازون والغاز الطبيعي اللي هتستخدمة محطات توليد الكهرباء علشان تولد الكهرباء علي الشبكة .
طيبة خطة تخفيف الأحمال دي مكملة معانا لحد امتي ؟.
لحد اللحظة اللي احنا مع حضراتكم فيها دلوقتي، خطة تخفيف الاحمال مكملة معانا شوية حلوين، وبس في اجتماعات كتيرة حصلت في الفترة اللي فاتت بين مسئولي وزارة الكهرباء والبترول والثروة المعدنية علشان وزارة البترول تجدول المديوينة الموجودة علي وزارة الكهرباء واللي بتوصل لـ168 مليار جنيه، خصوصا ان وزارة الكهرباء حاطة امل كبير علي خطة تسعير شرائح الكهرباء الجديدة واللي هتبدا الشركة تطبيقها في شهر 6 اللي جاي علشان تدفع جزء كبير من المديوينة اللي عليها .
خليني اقول لحضراتكم كمان أن وزارة الكهرباء والطاقة المتجددة، حاليا بتدرس انتهاء خطة العمل بجداول تخفيف الاحمال قبل دخول فصول الصيف، خصوصا ان الفترة دي معروفة ان درجات الحرارة بتكون فيها عالية جدًا والناس بتشغل المراوح والتكييفات، واي قطع في الكهرباء في الفترات دي هيكون مشكلة للناس مع الحكومة .
طيب ليه وزارة الكهرباء لجأت لخطة تخفيف الاحمال اساسا؟.
وزارة الكهرباء والطاقة المتجددة لجأت لخطة تخفيف الاحمال بسبب ارتفاع الأحمال الكهربائية علي الشبكة القومية للكهرباء لارقام اول مرة توصل لها في التاريخ، وده تزامن مع انخفاض ورادات الوقود اللي هتستخدمها محطات توليد الكهرباء من البترول والوقود والمازوت والغاز الطبيعي اللي هتحاجه المحطات علشان تشتغل وتدور وتولد الكهرباء.
مش كده بس قطع الكهرباء له شوية عوامل تانييين غير انخفاض واردات الوقود الخاص بمحطات توليد الكهرباء واهمهم ارتفع فاتورة سرقة التيار الكهرباء من المحافظات، خصوصا ان نسبة الطاقة المولدة اكبر بتكتير من نسبة الطاقة اللي الدولة بتحصل عليها فواتير، وبالتالي في نسبة فقد كبيرة جدا بتروح من علي الشبكة بتاع الكهرباء بدون ما حد يدفع فيها فلوس، وبالتالي انتهاء الكهرباء بيدأ يقل من هنا الوزارة قررت تقطع الكهرباء لمدة ساعتين علي الناس من الساعة 8 صباحا وحتي 3 مساءا .
طيب اية الجديد في موضوع تخفيف الاحمال؟.
النهاردة الدولة قررت تعديل خطة تخفيف الأحمال اليومية بعد ما حصل تنسيق مع وزارة البترول والثروة المعدنية وهتكون المواعيد الجديدة للتخفيف من الساعة 3 لحد الساعة 7 وبرضوا مده فصل الكهرباء مش هتزيد عن ساعتين لكل منطقة، والكلام ده هيبدأ يطبق من اول بكرة ولحد يوم 20 يوليو اللي جاي، وده بناء علي طلب وزارة التربية والتعليم واللي طالبت بتعديل خطة تخفيف الأحمال بسبب الأمتحانات علشان الكهرباء متقطعش علي العيال وهيا بتتمحن في الفصول .