سعر الصرف والاحتياطي والصادرات.. الجنيه يضرب الدولار في ليلة حزينة

ايه اللي حصل النهاردة للدولار في البنوك ودا معناه إيه وإيه المفاجأة اللي فجرها المركزي النهاردة بردوا وخلت الدولار يعيش ليلة صعبة وايه كمان حكاية الصادرات الغذائية النهاردة.. تعالو نشوف اللي حصل ايه

النهاردة البنوك رجعت العمل بعد اجازة طويلة من يوم الخميس اللي فات بسبب الأعياد وكان متوقع إن الدولار هيرفع في سعر الصرف عشان الاجازة لكن اللي حصل كان مفاجأة والدولار نزل حوالي  قرش مرة واحدة وصل ل 47.65 جنيه بعد مارفع لحدود 48.20 تقرييا..
طيب ايه السبب في نزول سعر الدولار النهاردة.. من غير تفكير طبعا الاخبار السارة اللي كانت على مدارالأيام اللي فاتت ومنها تقرير صندوق النقد الدولي واللي اتوقع تدفقات دولارية ب107 مليار دولار في الفترة الجاية وزيادة 13 مليار دولار في موارد الدولة الدولارية وغير طبعا تعديل وكالة التصنيف الائتماني لمصر الي ايجابي وده كان تطور كبير جدا في مصير الدولار لأنه معناه ببساطة فتح الطريق لعودة الاشتثمارات الضخمة للسوق المصري وزيادة التدفقات المستدامة من العملة الأمريكية وعودة رؤوس الأموال.
كمان من بين الاسباب اللي وقعت الدولار هو حالة الزحام الكبير على فروع شركات الصرافة في مصر لتبديل الدولار والعملات ووصلت في 3 شركات لحوالي 20 مليار جنيه من ساعة التعويم في مارس اللي فات، وكمان مش عاوزين ننسى التوقعات الدولية لنهوض الاقتصاد المصري واللي ساعدت في تعديل التصنيف.
النهاردة كمان البنك المركزي المصري وجه ضربة للدولار ومفاجأة كبيرة لما اعلن عن حجم الاحتياطي النقدي واللي وصل لأعلي قيمة ليه من 4 سنين وقربه من حاجز ال42 مليار دولار وده طبعا معناه إن رصيد الدولة من الدولار في زيادة مستمرة ودا غير التدفقات الكتيرة اللي جاية في الطريق.
وعاوزين نفكركم بحاجة تانية حصلت النهاردة هتعمق أحزان الدولار وهي ارتفاع صادرات المواد الغذائية خلال الربع الأول من 2024 واللي بلغت 1.6 مليار دولار، بنسبة نمو 31% مقارنة بنفس الفترة من العام السابق، والتي بلغت حينها 1.2 مليار دولار يعتني بنتكلم عن 400 مليون دولار زيادة في بند واحد من بنود الصادرات ودي أكتر حاجة ممكن تجيب الدولار الأرض لأن الانتاج والتصدير هما اللي بيضمنوا توفير العملة الأمريكية.

الخلاصة إننا لو دورنا على أسباب سقوط الدولار النهاردة وفي الايام الجاية هنلاقي أسباب كتير جدا ، وده معناه ببساطة إن الدولار دخل بيت الطاعة في البنك المركزي ومعناه عودة الروح بقوة للجنيه المصرية وارتفاع قيمته الشرائية ودي أكتر حاجة بتهم المصريين في الموضوع كله لان الناس نفسها الجنيه يرجع زي زمان.