3 ونص مليار دولار خسارة.. صدمة عنيفة للحكومة.. شوف اللي حصل
ايه اللي حصل في الموارد الدولارية وإزاي مصر خسرت أكتر من 3 مليار ونص دولار في سنة واحدة وهي في عرض دولار واحد.. تعالوا نشوف إيه الحكاية في التقرير ده وهنعرف قد إيه الحكومة مصدومة من الخسارة اللي خارجة عن إرادتها.
بعد صفقة رأس الحكمة الوضع في مصر اتغير تماما وبعد الأزمات الكبيرة والصعبة الأمور بدأت تستقر وترجع لطبيعتها، وضمنت مصر تدفقات دولارية ضخمة من الصفقة ومن قرض صندوق النقد ومن البنك الدولي والاتحاد الأوروبي وغير المواراد الدولارية الطبيعية للبلد وعودة المال الساخن والاستثمارات الأجنبية بعد اتفاق الصندوق وتعديل تصنيف مصر الائتماني دوليا.
لكن للأسف في وسط الأخبار الإيجابية والمفرحة في موضوع الدولار وهبوط سعره وانتهاء السوق والانفراجة الكبيرة في الأسعار والأسواق حصلت حاجة مكانتش على البال وصدمت الحكومة المصرية واللي فقدت موارد دولارية بأكتر من 3 ونص مليار دولار وهو مبلغ ضخم جدا وكان هيفرق مع مصر جدا في الوقت ده..
اللي حصل إن صندوق النقد الدولي طلع تقرير حديث بخصوص موارد مصر الخمسة من الدولار وتوقع ارتفاعها في السنة الحالية إلى 13.7 مليار دولار أو بنسبة 14.6% مقارنة بأرقام السنة اللي فاتت وتوقع الصندوق وصول تدفقات النقد الأجنبي من المصادر اللي قلنا عليها إلى 107.3 مليار دولار مقابل 93.6 مليار دولار في السنة اللي قبلها، بحسب تقرير الخبراء واللي أصدره في الساعات اللي فاتتت حولين اتفاق برنامج الإصلاح الاقتصادي مع مصر وتنفيذ المراجعة الأولى والتانية.
ولو مش عارف مصادر الدولار الأساسية في مصر فهي السياحة وقناة السويس والتصدير وتحويلات المغتربين وصافي الاستثمار الأجنبي المباشر.
طيب دي أخبار إيجابية أومال فين المشكلة.. شوف حضرتك تقرير صندوق النقد توقع في نفس الوقت تراجع إيرادات قناة السويس خلال السنة المالية الحالية إلى 6.8 مليار دولار مقابل 8.8 مليار دولار في السنة اللي فاتت بنسبة انخفاض 22.7%، يعني بنتكلم في 2 مليار دولار، وتوقع الصندوق عودة ارتفاع إيرادات القناة في السنة الجاية وتحقيق قفزة بـ 10 مليار دولار.
كمان صندوق النقد توقع انخفاض إيرادات مصر من السياحة في موسم 2023-2024 إلى 12 مليار دولار مقابل 13.6 مليار دولار في الموسم اللي قبله وبنسبة تراجع 11.8%، يعني مصر خسرت مليار و600 مليون دولار، وتوقع الصندوق عودة الصعود وتحقيق قطاع السياحة لطفرة كبيرة هتوصل لـ 12.6 مليار دولار في العام المالي-2025.
