تلال الدهب وبحيرات البترول والغاز.. اكتشافات تقلب موازين مصر

لو قالولك إن 90 في المية من مساحة مصر صحرا متصدقهمش.. وقولهم دي مش صحراء دي كنوز وخير ومليارات وثروات ملهاش حدود.. ياترى إيه الحكاية وإيه قصة تلال الدهب وبحيرات البترول والغاز اللي ظهرت في مصر.. شوفوا معانا التقرير  للأخر

في التاريخ معروف إن مصر طول عمرها بلاد خير وهي اللي أكلت العالم وقت أشهر مجاعة في التاريخ البشري ومكانتش بتودي مساعدات ولا شاحنات دي كانت بتطعم شعوب ودول بحالها لمدة سبع سنين حضرتك متخيل حجم الخير والثروات والمخازن اللي كانت في مصر، وعشان كده مصر لسه فيها كنوز بمليارات الدولارات تحت الأرض.
كفاية تعرف إن الدهب في بلاد الفراعنة كان زي التراب بالظبط وإن فيها مناجم ضخمة لسه محدش اكتشفها ودا اللي بتعمله وزارة البترول والثروة المعدنية دلوقتي بالتعاون مع شركات القطاع الخاص والشركات العالمية المتخصصة بعد تغير فكر الاستثمار في قطاع الدهب وتطور عمليات التتنقيب، واعتمدت الوزارة خطة لاستكشاف عشرات المناجم من الدهب في الفترة الجاية وبحجم استثمارات 7.5 مليار دولار كبداية.
ولو متعرفش مصر فيها 270 موقع لإنتاج الدهب دلوقتي من بينها حوالي 120 موقع ومنجم معروفين تم استخراج الدهب منهم قديما، والباقي مناطق جديدة لسه خيرها جاي وكان أخرها اكتشاف منجم جديد للدهب بمنطقة أبو مروات واللي بيحتوي على احتياطي استراتيجي يصل إلى 290 ألف طن، واللي هيكون له مردود إيجابي على الاقتصاد القومي، ودي مجرد بداية لاكتشافات أعظم وممكن بكرة يبقي عندها 100 منجم دهب زي السكري واللي هو واحد من أكبر مناجم الدهب في العالم وكان ليه فضل كبير في تعظيم الاحتياطي النقدي لمصر في فترات الأزمات.. وبنفكركم إن دهب يعني دولار ويعني أمان مالي واستراتيجي للدولة ويعني ضعف للدولة وقوة للجنيه وثروة هتقلب موازين مصر.

من بين المشروعات اللي مصر مستنياها بفروغ الصبر هي نتايج التنقيب عن الدهب في مناطق بئر أسل وجبل الميت بالصحراء الشرقية ودي على مساحة 350 كيلو متر مربع ودي بتساوي مساحة دول حولينا ودي شغالة فيها شركة إيه. كيه. إتش جولد البريطانية ومتوقع ليها احتياطيات ضخمة من الدهب.

بعد الدهب مصر بتعول على ثروات البترول والغاز عشان تللبي الطلب الضخم على استهلاك المواد البترولية في مصر واللي بينهش ميزانية الدولة كل سنة، وزمان فيه خبير نفطي قال كلمة حكمة وهي إن مصر واقفة بين بحرين من الغاز والبترول وبحر غربي في ليبيا وشرقي في الخليج العربي وطبيعي يكون عندها ثروات نفطية زي الخليج العربي وإن الموضوع عاوز صبر وخطط تنقيب قوية ودي اللي بتعمله الحكومة دلوقتي بردو بخطط ضخمة بتوصل في بدايتها لحوالي 10 مليار دولار استثمارات أجنبية فى صناعة الغاز والبترول العام المالى الحالي.