ليه وكالة فيتش عدلت تصنيف مصر؟.. هنقولك مفاجأة هتحصل الأيام الجاية
يا ترى ليه وكالة فيتش عدلت تصنيف مصر من مستقرة الى ايجابية؟ وايه تأثير ده على مناخ الاستثمار فى مصر؟ والدولة ممكن تستفاد منه إزاي؟ والأهم هي مين وكاله فيتش دي أصلا ؟ ويعني ايه التصنيف الائتماني اللي بيتكلمه عنه ده؟
فى الساعات الأخيرة وكالة فيتش عدلت النظرة المستقبلية لمصر من مستقرة إلى إيجابية، ووضعت تصنيف مصر عند “-B”.. وده أثار تساؤت كتيرة حوالين يعنى ايه تصنيف ائتماني ؟ وليه الدول بتهتم بشكل كبير بالتقييمات الصادرة عن وكالات التصنيف الائتماني؟ وايه اللى بيحصل لما النظرة بتتحول من مستقرة الى ايجابية او العكس ؟ وغيرها من الأسئلة اللى هنجاوب عليها مع حضراتكم
وأول حاجة يعنى ايه تصنيف ائتماني؟
بص يا سيدي .. التصنيف الائتماني ببساطة هو تقييم مُعين لقدرة المقترض على الوفاء بسداد الديون أو الالتزامات المالية اللى عنده بببساطة بيعني (هل الدولة اللي عليها ديون خارجية تقدر تدفع الديون دي ولا لأ، وبناء عليه بيتم وضعها في تصنيف ائتماني سواء إيجابي أو سلبي).
طب التصنيف ده بيعتمد على اى معايير؟
التصنيف الائتماني بيعتمد على تحليل شامل لعدد من العوامل المالية والاقتصادية المرتبطة بالدولة اللي عليها ديون وأهم العوامل دي القدرة على السداد، والتاريخ الائتماني، والسيولة، إضافة إلى الاقتصاد العام والصناعة.. وغيرها من العوامل ذات الصلة اللى بتحدد قدرة الملاءة المالية للدولة المقترضة
وايه هي بقا وكالات التصنيف الائتماني؟
فيه عدد من وكالات التصنيف المعرتف بيها عالميا وأشهر وكالات تصنيف ائتماني مستقلة ومعروفة عالمياً هي فيتش، وستاندرد آند بورز و موديز، والوكالات دي دورها تقييم الائتمان والمخاطر المالية.
وايه أنواع التصنيفات الائتمانية الخاصة بالدول؟
وكالات التصنيف المفروض جاهات محايدة بتوضح قدرة الدولة على سداد التزاماتها، ووضعها الاقتصادي، وبتقدم النصيحة للمستثمرين، وبتضع تصنيف محدد وفق تصنيف معترف بيه عالميا مع وضع نظرة مستقبلية إما مستقرة أو سلبية.
وبيتم تصنيف المقترض عادة برموز وحروف تعبر عن درجات الائتمان المختلفة، على سبيل المثال، يمكن أن يكون التصنيف AAA هو أعلى تصنيف ممكن، يليه AA ثم A، وهكذا.
والتصنيف لما بيكون إيجابي بيدل على قلة المخاطر المرتبطة بالدولة المقترضة وعلى العكس لما بيكون التصنيف سلبي بيدل على وجود مخاطر خاصة بعدم السداد من قبل الدولة وبيتم تصنيفها بتصنيف خاصة بالمخاطر الأعلى زي CCC أو D.
نيجي للسؤال المهم ايه تداعيات التصنيف الائتماني على الدولة؟
التصنيف الائتماني للدولة ضروري جدا لأنه بيوضح هل الدولة قادرة على سداد الديون، اللى اقترضتها من مصادر خارجية ولا لا .. وعند حاجة الدولة للاقتراض بيكون قدامها اختيارين الاقتراض من دولة تاني وده بيكون من خلال (ودائع، الاستثمار المباشر أو غير المباشر)، والخيار التاني الاقتراض من خلال طرح سندات
و إصدار السندات من قبل الدولة لازم يكون ليه تصنيف يوضح هل الدولة هتقدر تدفع التزاماته ولا لا، وعشان كده المقرضين لمصر أو غيرها من الدول (سواء إقراض مباشر أو الاستثمار في السندات) لازم يتعرفوا الاول على قدرة الدولة المقترضة على السداد ورد الأموال وسداد فوائدها بشكل دوري.
طب ليه فيتش عدلت نظرتها لمصر؟
وكالة “فيتش عدلت النظرة المستقبلية لمصر من مستقرة إلى إيجابية، وأكدت الوكالة تصنيف مصر عند “-B”،وقالت ان ده بسبب انخفاض مخاطر التمويل الخارجي وقوة الاستثمار الأجنبي المباشر.
وتوقعت وكالة التصنيف العالمية ان مرونة الصرف هتكون أكثر استدامة مما كانت عليه في الماضي وده بيعكس جزئيا مراقبتها الوثيقة في إطار برنامج تسهيل الصندوق الممدد الموقع بين مصر والصندوق والذي يستمر حتى أواخر عام 2026”… والكلام ده معناه أن تحرير سعر الصرف خلا فيه استقرار أكتر في مصر ، وكمن التعاون بين مصر وصندوق النقد ساعد على تغيير النظرة لمصر على أنها مستقرة
