بعد قرار الفدرالي.. البنك المركزي ناوي على إيه في 23 مايو

 

ياترى البنك المركزي المصري ناوي على إيه بعد تثبيت الفدرالي الأمريكي لسعر الفايدة وايه هيكون قراره في الاجتماع الجاي في 23 مايو بخصوص اسعار الفائدة ومصير الجنيه والدولار بعد التاريخ ده.. خليكم معانا للآخر وهتعرفوا التفاصيل 
 
زي ما احنا عارفين إن البنك الفدرالي الأمريكي ثبت سعر الفايدة على الدولار في اجتماعه امبارح دون تغيير في نطاق بين 5.25% و5.5% وذلك للمرة الرابعة على التوالي.
واكيد كل البنوك المركزية العالمية بتتأثر بقرار المركزي الأمريكي لأن أغلبها مرتبطة بالدولار كعملة دولية في التعاملات والتجارة والديون والاقتراض وبتاخد قراراتها بما يتماشى مع قرارات الفدرالي وزي ما احنا عارفين لجنة السياسة النقدية في البنك المركزي المصري هتجتمع في 23 مايو الحالي عشان تحسم مصير الفايدة على الجنيه واكيد قرارها هيكون ليه تأثير على سوق الصرف والتضخم والاقتراض .
ورغم قرار الفدرالي  بتثبيت سعر الفائدة الأمريكية فأغلب الاقتصاديين شايفين إنه مش هيكون ليه أي تأثير على قرار البنك المركزي المصري في اجتماعه الجاي وده لأن الآليات الاقتصادية في مصر حاليا منعزلة تماما عن الولايات المتحدة، وملهاش علاقة في ظل الظروف الاقتصادية الداخلية ، والعوامل الخارجية الأقوى تأثيرا من قرار الفائدة الأمريكية وشايفين إن تثبيت الفيدرالي للفائدة يرتبط بالاقتصاد الأمريكي، ولن ينعكس على مصر في أي أثر.
طيب نرجع لتوقعات قرارات المركزي المصري الجاية بخصوص الفايدة.. شوف حضرتك لغاية دلوقتى محدش يقدر يتوقع بشكل قاطع البنك المركزي بيفكر في إيه لكن كل فريق اقتصادي بيقول توقعاته بناءً على المؤشرات والبيانات المتاحة وخاصة نسب التضخم ومثلا توقع محمد عبد العال الخبير المصرفي، رفع البنك المركزي سعر الفائدة للمرة التالتة في 2024 في اجتماعه الجاي بعد تثبيت الاحتياطي الفيدرالي الأميركي سعر الفائدة  والخبير شايف إن استبعاد المركزي الأميركي خفض سعر الفايدة على الدولار على المدى القريب قد يكون أحد العوامل اللى هتدفع لجنة السياسة النقدية بالبنك المركزى المصري إلى رفع سعر الفايدة مرة تانية لتحافظ على جاذبية الجنيه لصالح الاستثمار الاجنبى غير المباشر .
توقع عدد من الخبراء والمحللين أن يتجه البنك المركزي المصري لتثبيت أسعار الفائدة خلال اجتماعه في مايو المقبل، واختلفوا مع توقعات بنك جولدمان ساكس، الذي رجح خفض الفائدة 2% في الاجتماع نفسه، فيما رجح الخبراء أن يتجه البنك إلى التخفيض خلال النصف الثاني من العام الحالي.
اما بنك الاستثمار الأمريكي جولدمان ساكس، فتوقع تخفيض البنك المركزي المصري لأسعار الفايدة 2% في اجتماع لجنة السياسة النقدية الجاي بسبب بانخفاض التضخم إلى 20% بنهاية العام الحالي، كمان رجح البنك، في تقرير حديث تراجع معدل التضخم فى مصر إلى  20% وذلك بنهاية 2024.
وفيه فريق تالت شايف إن قرار المركزي الجاي هيكون تثبيت أسعار الفايدة وحجتهم إن  التضخم لسه في مستويات أعلى من 30% والرؤية ما زالت ضبابية، وصعب المركزي يخفض سعر الفايدة مع النسبة العالية دي للتضخم .
وزي ما احنا عارفين ان رفع معدلات أو سعر الفايدة في أي دولة بيشجع على الاستثمار في أسواقها وبالتالي هيرتفع الطلب على العملة بتاعتها وهترتفع قيمتها والعكس صحيح.