الصاغة تحبس أنفاسها.. سوق الدهب على فين ومصير مبادرة المغتربين

ايه الللي هيحصل في الصاغة الأسبوع الجاي وليه التجار حابسين أنفاسهم وليه الأسعار ممكن تضرب في سوق الدهب وياترى الحكومة ناوية على إيه.. تعالة نشوف المفاجآت اللي في الطريق

الدهب مرة تحت ومرتين فوق وكله على حسب السوق والعرض والطلب وأكتر حاجة بتحدد سعره الأزمات الدولية والحروب والصراعات لأنه هو الملاذ الاخير والآمن للدول والأفراد عشان تحميهم من خسارة فلوس ومدخراتهم واحتياطياتهم..
وزي ما احنا عارفين إن الفدرالي الأميركي ثبت امبارح سعر الفايدة على الدولار والقرار ده رغم إنه ببكشف عن مؤشر استقرار لكن اللي حصل في سوق الدهب كان العكس وارتفعت الأسعار في السوق العالمية للدهب بعد وقت قليل من إعلان قرار الفدرالي ودا لأن  فيه توقعات قوية بتأكد إن الفدرالي هيوقف سياسة التشدد في اسعار الفايدة وكمان هيتجه في النص التاني من 2024 لخفض سعرها ودا معناه ارتفاع كبير ومتوقع في اسعار الدهب لنفس السبب للي قلنا عليه وهو زيادة الطلب عن العرض لأنه مع خفض الفائدة اسعار الدولار هتنزل وساعتها هيحصل طلب كبير على الملاذ الأمن.
دا عالميا لكن ايه اللي هيحصل في مصر واسعار الدهب هتروح على فين.. في العادي السوق المصري ليها وضع خاص ورغم ارتباطها طبعا بالسوق العالمية للدهب من خلال الدولار لكن فيه حاجات تانية بتأثر زي القرارت الاقتصادية مثلا وزي مواسم الخطوبة والأعياد وزيادة الطلب وفيه حاجة كمان مهمة وهي مصير مبادرة دخول الدهب مع المغتربين برسوم رمزية وزي ما اخنا عارفين بردو إن مبادرة السماح باستيراد الدهب بصحبة المصريين العائدين من الخارج بدون رسوم جمركية هتنتهي في 10 مايو 2024، وسط توقعات متضاربة حول مصير المبادرة واللي سمحت بدخول حوالي 4.5 طن  دهب منذ إطلاق المبادرة في مايو 2023 بهدف ضبط سوق الصاغة..
التوقعات بتقول إن عدم تجديد المبادرة هيتسبب في نقص المعروض من الدهب وفي نفس الوقت انتشار اخبار سلبية عن الصاغة والعرض والطلب وعودة التلاعب في الصاغة وخاصة إنه لسه السوق مااستقرتش بشكل كبير وشفنا حالة الاضطراب والفوضي اللي كان فيها سوق الدهب الأيام اللي فاتت.
طيب وعشان كده بقنولك لو هتشتري دهب الحق اشتري دلوقتي لأن منحني صعود الأسعار في الطالع عالميا ولو الحكومة ماخدتش قرار المد لمبادرة الدهب ومعاه دخول الأعياد اسعار الدهب هترفع بشكل كبير جدا وده اللي بيقوله تجار الصاغة وشايفين إن ده أفضل وقت للاستثمار والشراء قبل فوات الأوان.