آخر فرصة لو هتشتري دهب.. شوف اللي هيحصل الأسبوع الجاي
إيه اللي هيحصل في مايو واللي ممكن يقلب موازين الصاغة المصرية واسعار الدهب.. وايه النصيحة اللي لازم تعمل بيها دلوقتي وقبل فوات الاوان.. وياترى ايه مصير الدهب الفترة الجاية.. شوف التقرير ده وهتعرف التفاصيل
معروف طبعا إن الدهب طول عمره فرصة ممتازة للاستثمار والادخار والزينة في نفس الوقت وهو من المعادن النادرة اللي قيمتها بتزيد مع الايام وبيحفظ قيمة الفلوس من اي انخفاضات في سعر الصرف وعشان كده بيعتبر إستثمار مهم لاصحاب المدخرات واللي معاهم فلوس زيادة ومش عاوزين يخاطروا بيها في مجالات استثمار تانية.
وعشان تستثمر صح في الدهب يبقي لازم تتابع السوق كويس جدا وتعرف امتى تبيع وامتى تشتري وعشان كده بردوا بنقولك أن الدهب استثمار طويل الأجل يعني لو عاوز تكسب كويس يبقي لازم تصبر من سنة لتلات سنين عشان تلاقي عائد كويس وخبراء الدهب بينصحوا بشراء المشغولات لو هتستخدم الدهب في الزينة بجانب الاستثمار أو السبايك والجنيهات الدهب
طيب ايه اللي هيحصل في مايو الحالي وهيأثر بشكل كبير في أسعار الصاغة وسبق ونبهنا عليه في بانكير.. شوف حضرتك في 10 مايو الحالي هيكون اخر معاد لمبادرة دخول الدهب مع المغتربين بدون جمارك ولغاية دلوقتي الحكومة ما اعلنتش أنها هتمدد المبادرة ولو حصل وانتهت المدة من غير قرار ده معناه إن السوق هيفقد مورد مهم من موارد تدفق المعدن الأصفر وده بجانب اقتراب عيد الاضحى متوقع يكون فيه زيادة في الطلب على المعروض وهنا أسعار الدهب مرشحة للزيادة بشكل كبير حسب قانون العرض والطلب وده غير ان أسواق الدهب منتظرة حدث عالمي مهم وهو اعلان قرار الفدرالي الأمريكي بخصوص اسعار الفائده على الدولار وأغلب التوقعات بتقول إن المركزي الأمريكي هيتجه لتخفيض سعر الفايدة وده معناه ارتفاع أسعار الدهب في السوق العالمية لأن الدهب عكس الدولار في السوق والبنوك المركزية بتتجه لشراء الدهب عشان تحافظ على قيمة الدولارات والاحتياطي عندها.
ليه بنفكركم باللي هيحصل في مايو... عشان ببساطة ده أنسب وقت لشراء الدهب وتخزينه وممكن تقول كده إنها آخر فرصة لو عاوز تستثمر لأن اسعار الذهب دلوقتي رخيصه ومرشحة أنها تزيد بقوة للأسباب اللي قلنا عليها وخبراء الصاغة بينصحوا بالشراء في الوقت الحالي لأن ده المعاد المناسب في 2024 في وقت كل التوقعات بتقول إن اللي جاي في سوق الدهب صعب وإنه على موعد مع زيادات كبيرة في الفترات الجاية.
