مدبولي يكشف عن تاني أكبر مشروع في مصر بعد رأس الحكمة... والأسعار الجديدة للكهرباء

متابعينا الكرام في كل مكان اهلا وسهلا بكم وتحليل جديد لأهم  التقارير والتحليلات اللي قدمتها وحدة أبحاث بانكير النهاردة لأهم الأحداث الاقتصادية والمالية

البداية مع تقرير مهم جدا بخصوص الاعلان عن مشروع ضخم في صعيد مصر لإنتاج الكهرباء من طاقة الرياح باستثمارات أجنبية مباشرة هتوصل ل9 مليار دولار وطبعا ده رقم كبير جدا إنه يتحط في مشروع أو مشروعين في مكان واحد لكن في نفس الوقت ده مؤشر حقيقي على تعافي الدولة من أزمة نقص الدولار اللي عاشت فيها طول السنة اللي فاتت.
أهمية المشروع اللي أعلنت عنه الحكومة النهاردة إنه تاني اكبر مشروع بعد راس الحكمة يتم الكشف عنه رسميا وهو ضمن اتفاقيات مؤتمر المناخ اللي نظمته مصر كوب 27  ووقعت على هامش أعماله مذكرات تفاهم تانية لإقامة مشروعات بمليارات الدولارات في قطاع الهيدروجين الاخضر والطاقة النظيفة.
طبعا الاعلان عن المشروع بحجمه الكبير ده أكيد هيكون ليه تأثير كبير على سعر الدولار في الايام الجاية لانه بيأكد وجود وفرة دولارية في البنوك وفي نفس الوقت بيأكد على عودة الاستثمارات بشكل قوي للدولة

منصات بانكير قدمت تقرير مهم النهاردة بخصوص قرار الحكومة مد فترة مبادرة السماح بدخول السيارات من الخارج بتيسيرات كبيرة للمغتربين
وقال التقرير إنه مع انتهاء العمل بقانون  التيسيرات للمصريين بالخارج، والمتعلقة باستيراد السيارات ، وافق مجلس الوزراء على طلب وزارة الهجرة وشئون المصريين بالخارج، السماح باستقبال التحويلات من الخارج لمدة شهر من تاريخ انتهاء القانون.
وبخصوص التفاصيل الحكومة خدت قرار مد المبادرة لاستكمال قبول التحويلات الواردة لمن أظهر الجدية في التقدم للمرحلة التانية من المبادرة، وصدر له أمر دفع على المنصة الالكترونية، وخاصة إن فيه التحويلات عالقة ومتأخرة بخلاف وجود صعوبات في إتمام تحويل المبلغ النقدي من الخارج  لبعض الحالات قبل انتهاء المبادرة، نتيجة أسباب مُختلفة خارجة عن ارادتهم رغم جديتهم.

من بين التقارير المهمة اللي قدمتها وحدة أبحاث بانكير النهاردة بخصوص سيناريوهات أسعار الكهرباء الجديدة

وزي ما احنا عارفين فى بداية  2024  وزارة الكهرباء أعلنت  زيادة أسعار الكهرباء ما بين 16 و26% اعتبارا من يناير 2024 وحتى نهاية يونيو يعني لمدة 6 شهور هتنتهى الشهر الجاي.
وأضاف التقرير إن وزارة الكهربا بتجهز دلوقتي  تقرير مفصل هتعرضوا على رئيس مجلس الوزراء بيتضمن السيناريوهات والمقترحات الخاصة بتعريفة الكهرباء السارية حاليا لبحث تحريكها أو تثبيتها في شهر يوليو  خصوصا ان أخر تسعيرة هينتهى العمل بيها الشهر الجاي.

وحسب الملعلومات المتاحة التقرير اللى هيعرض على رئاسة الوزراء هيتضمن عرض التكلفة الفعلية الحالية لإنتاج الكيلووات ساعة من الكهرباء واللي ارتفعت بشكل كبير نتيجة للمتغيرات في سعر الوقود وزيادة سعر صرف الدولار مقابل الجنيه والعوامل دي طبعا بتؤثر على سعر الكهرباء اللي مازال مدعوم من الدولة وما تمش تحريره بالكامل.

وتوقع التقرير وجود 3 سيناريوهات قدام الحكومة للتعامل مع اسعار الكهربا الأول زيادة أسعار الكهرباء لمدة 6 شهور تانية بنسب مختلفة وفقا لحجم الاستهلاك ويتم البت مرة تانية في الأسعار بعد نهاية الفترة وفقا لسعر صرف الدولار مقابل الجنيه وسعر الوقود.

أما السيناريو التاني فهو زيادة أسعار الكهرباء بشكل سنوي في يوليو كل عام وتكون الزيادة الأكبر في تعريفة الشرائح كثيفة الاستهلاك

أما  السيناريو التالت فبيطرح تثبيت أسعار الكهرباء، ثم زيادة التعريفة بما يتناسب مع المتغيرات.

منصات بانكير قدمت كمان تقرير عن حالة القلق والترقب في الاسواق الدولية والبنوك المركزية في انتظار قرار البنك الفدرالي النهاردة
وزي ما احنا عارفين من امبارح بدأ الاحتياطي الفيدرالي الأمركي اجتماعه النقدي اللى هينتهي النهاردة واللي هيتم من خلاله حسم مصير أسعار الفايدة على الدولار وسط حذر وقلق وترقب بيسود السواق فى العالم كله انتظارا للقرار المصيري واللي العالم كله مستني إنه يخفض سعر الفايدة على الدولار.

وعن  تأثير قرار الفيدرالى الأمريكي علي مصر.. قال التقرير إن مصر زي أي دولة في العالم بتتأثر بقرار الفدرالي بسبب ارتباطها المباشر مع الدولار في التعاملات والديون والفوايد والاقساط وزيادة الفايدة معناه زيادة تكلفة الديون لانها مقومة بالدولار

التقرير الأخير معانا النهاردة حولين مستقبل سوق الدهب في مصر وقال إن في 10 مايو الحالي هيكون اخر معاد لمبادرة دخول الدهب مع المغتربين بدون جمارك ولغاية دلوقتي الحكومة ما اعلنتش أنها هتمدد المبادرة ولو حصل وانتهت المدة من غير قرار ده معناه إن السوق هيفقد مورد مهم من موارد تدفق المعدن الأصفر وده بجانب اقتراب عيد الاضحى متوقع يكون فيه زيادة في الطلب على المعروض وهنا أسعار الدهب مرشحة للزيادة بشكل كبير حسب قانون العرض والطلب وده غير ان أسواق الدهب منتظرة حدث عالمي مهم وهو اعلان قرار الفدرالي الأمريكي بخصوص اسعار الفائده على الدولار وأغلب التوقعات بتقول إن المركزي الأمريكي هيتجه لتخفيض سعر الفايدة وده معناه ارتفاع أسعار الدهب في السوق العالمية لأن الدهب عكس الدولار في السوق والبنوك المركزية بتتجه لشراء الدهب عشان تحافظ على قيمة الدولارات والاحتياطي عندها.
وكشف التقرير إن مبادرة دخول الدهب بدون جمارك مع المغتربين دخلت للسوق 4 ونص طن دهب من ساعة الاعلان عنها لغاية اللايف اللي احنا بنقوله وده طبعا كان ليه دولار كبير في السيطرة على الصاغة في وقت الأزمة.