الصين هتعمل قلبان في مصر.. إيه اللي هيحصل في شهر 9 ؟
يا ترى الصين هتعمل ايه فى مصر فى شهر سبتمبر الجاي؟ وايه حكاية الوفد الصيني رفيع المستوى اللى جاي القاهرة؟ وايه علاقة ده بعضوية مصر فى تجمع بريكس اللى بيسيطر على 30% من حركة التجارة فى العالم؟ وازاى الزيارة المرتقبة ممكن تأثر على سوق الصرف ؟
العلاقات بين مصر والصين بتشهد تطور مهم وكبير من بداية 2024 وده بعد انضمام مصر رسميا الى ىتجمع بريكس اللى الصين واحدة من أهم مؤسسينه وعضو بارز فيه .. وفيه اتفاقيات تجارية ومالية كبيرة بيتم الترتيب ليها بين القاهرة وبكين هيكون ليها دور كبير ومهم فى تعظيم حركة التبادل التجارى بين البلدين خصوصا وان مصر منفتحة على الانخراط فى اتفاقيات لتبادل العملات المحلية فى اطار سعي الحكومة لتخفيف الضغط على الاحتياطي النقدي من الدولار وتقليل فاتورة الاستيراد لأقل حد ممكن
طب ايه بقا اللى هيحصل فى شهر 9 وهيكون ليه تأثير قوى على العلاقات بين مصر والصين؟
فيه تحركات وترتيبات بتتم مؤخرا للترتيب لزيارة وفد رجال أعمال صيني من مقاطعة "تشجيانج" الصينية لمصر في الفترة من سبتمبر إلى أكتوبر.
و الوفد ده هيكون كبير ومهم وعلى أعلى مستوى لأنه هيكون مكون من 15 إلى 20 من أكبر الشركات بالمقاطعة الصينية ومعظم الشركات دي بتعمل في قطاعات الصناعات الهندسية والغذائية وقطاع التكنولوجيا، والصناعات الكيماوية، وأيضا الغزل والنسيج، وقطاع الطاقة.
وأهمية الزيارة دي انها هتتيح الفرصة لعقد اجتماعات ثنائية بين الوفد الصيني والشركات المصرية واللي من المستهدف يتم خلالها توقيع بروتوكولات تعاون ومذكرات تفاهم وكمان اتفاقيات وعقود لإنشاء مصانع وشركات داخل مصر.
والشيء المبشر ان الشركات الصينية بالمقاطعة مهتمة بشكل كبير بالاستثمار في مصر في عدد من القطاعات الاقتصادية الواعدة خصوصا ان مصر بتعتبر بوابة لعدد من الأسواق المهمة بالنسبة للصين، وكمان الاستفادة من المزايا اللي بتوفرها الاتفاقيات التجارية بين مصر ودول العالم وأفريقيا ومنها اتفاقية الكوميسا وهي أكبر التجمعات الاقتصادية الأفريقية بالإضافة إلى اتفاقية الميركوسور، والكويز وغيرهم
ومقاطعة "تشجيانج" الصينية للى ميعرفش هي تالت أكبر مقاطعة اقتصادية في الصين بعد بكين وشنغهاي وبيعد قطاع الصناعات الزراعية من أقوى القطاعات الاقتصادية فيها بالإضافة إلى قطاع الصناعات الهندسية، وبتمتلك المقاطعة استثمارات في مصر تقدر بحوالي مليار ونص دولار تشمل مجالات المنسوجات والنفط والغاز والمنتجات البلاستيكية.
ووقعت جمعية رجال الأعمال المصريين، يوم 20 إبريل اللى فات بروتوكول تعاون مع مقاطعة تشجيانج لدفع وتشجيع التعاون الصناعي والاستثماري والتكنولوجي والتدريبي وذلك على هامش مشاركتها في مؤتمر التعاون والتبادل بين الصين ومصر عام 2024.
وبحسب إحصائيات جهاز التمثيل التجاري بلغ حجم التبادل التجاري بين البلدين 15.8 مليار دولار فى 2023، وبيمثل حجم التبادل التجاري بين مصر ومقاطعة تشجيانج وحدها حوالي 28 % بقيمه تصل إلى 4.4 مليار دولار.
