خفض أسعار 300 سلعة أساسية وقرارات جديدة.. تفاصيل أسبوع المفاجآت السارة
ايه اللي هيحصل في الأسبوع ده وايه حكاية المفاجآت السارة لللمصريين إيه علاقة المفاجات دي بالأسواق والحياة المعيشية للمواطنين.. كل ده هنجاوب عليه في الفيديو ده
من فترة كبيرة وتحديدا من ساعة جنون الدولار والسوق السودا والحياة بقت صعبة جدا على المصريين بسبب الارتفاع الجنوني في الأسعار واللي طالت كل السلع وبقت أزمة كبيرة بتواجه كل بيت في مصر ورغم كل المحاولات الحكومية السابقة لحل أزمة الاسعار لكن مكنتش بتلاقي صدى وتفاعل لأن الدولار كان لسه سعره في العالي والتجار كانوا عملينه شماعتهم.
دلوقتي الوضع اختلف بعد تعويم الجنيه ومبقاش فيه حجة للتجار ورغم فشل مبادرات تخفيض الأسعار بعد التعويم مباشرة لكن الحكومة فضلت ورا التجار ووصل الموضوع لتهديد رئيس الوزرا إنه هينفذ تعليمات الرئيس إن الدولة تشتيري سلع وتبيعها مباشرة للناس وهنا بدأ التجار يخافوا وحصل تجاوب في مبادرة تخفيض الأسعار وفعلا فيه اسعار نزلت بس مش بالشكل المطلوب لغاية الحكومة ما اكتشفت إن فيه حلقة مفقودة في قصة الأسعار دي وهي إن التنفيذ بيكون على مستوى القمة ومش بيوصل للبقال اللي تحت بيتك وعشان كده قررت تعمل منظومة رقابة قوية على الاسواق
نرجع لموضوعنا وهو مفاجات الاسبوع ده وأولها بإعلان وزارة التموين إنه خلال الأيام الجاية هيحصل نزول في أسعار 300 سلعة أساسية في الأسواق وقالت إن سعر زيت الطعام انخفض بنسبة 36% في الأيام اللي عدت.
المفاجأة التانية هي اللي كشفت عنها الشعبة العامة للمخابز،بانه بداية من النهاردة الأحد هيتم تطبيق مبادرة خفض أسعار الخبز السياحي بعد تراجع سعر الدقيق بنسبة تقرب من 35%، وبناء على الاتفاق مع الدكتور مدبولي وهيكون سعر رغيف الخبز السياحي وزن 80 جراما بـ150 قرش ورغيف الخبز وزن 40 جراما بـ 75 قرشا ورغيف الخبز 25 جراما بـ50 قرش، كما تضمنت أيضا سعر الفينو بـ 100 قرش للرغيف وزن 25 جرام، وبسعر 150 قرشا لرغيف الفينو وزن 50 جراما.
والجديد إنه هيكون فيه إعلان عن الأسعار الجديدة على واجهات المخابز والمحالات وهيكون فيها أرقام الجهات المختصة لو حصل أي تلاعب من التجار في الأسعار أو الأوزان أو أنواع السلع، وإن عصر التلاعب انتهي وانه هيكون فيه اجراءات تانية خالص للسيطرة على الاسواق ودي بعد أداء الحكومة الجديدة لليمين الدستورية ودي المفاجأة الأخيرة معانا لأن الوزارات هيكون عندها تعليمات إن الإسعار وحياة الناس المعيشية على رأس الأولويات للرئيس.
