قرارا تاريخي للحكومة وباب جديد للدولار.. إيه اللي حصل

ايه اللي حصل نهاردة في مجلس الوزرا وايه هو القرار التاريخي اللي خده مدبولي وليه اتأخر سنين طويلة.. وإزاي هيكون باب جديد لملايين الدولارات كل السنة.. تعالو نشوف إيه الحكاية

فاكرين لما قلنا امبارح في بانكير إن مدبولي قال كلام مهم جدا عن الدولار ومن بين الكلام إن الحكومة شغالة على كل قطاعات الدولة اللي بتجيب دولار واستحداث أي قطاع تاني ممكن يجيب دولار لضمان موارد دولارية في السنة متقلقش عن 300 مليار دولار حسب الرؤية اللي سبق وأعلنتها الحكومة قبل كده.. طيب ايه اللي حصل نهاردة في مجلس الوزراء وخلانا نرجع نفكركم بكلام الدكتور مدبولي..

شوف حضرتك النهاردة كان الاجتماع الاسبوعي بتاع الحكومة وفي نهايته صدر بيان بالقرارات اللي خدها المجلس من بينها موافقة مجلس الوزراء على مشروع قرار بإنشاء منطقة حرة خاصة باسم شركة قناة السويس للقوارب الحديثة  كشركة مساهمة مصرية وعلى مساحة 51150 متر مربع بالكيلو 8 جنوب سفاجا بجوار شركة ترسانة جنوب البحر الأحمر من الاتجاه الغربي.

وكمل البيان إن هدف المنطقة الجديدة هو تصنيع وصيانة اليخوت والوحدات البحرية، مع الالتزام بالحصول على التراخيص والموافقات من الجهات المختصة، كمان بيستهدف المشروع تصنيع وصيانة وتصدير اليخوت البحرية بمستوى عالمي يضاهى الترسانات الأوروبية والعالمية، ووضع مصر على الخريطة العالمية لصناعة اليخوت والاستفادة من عائدها المادية الكبيرة بالعملة الأجنبية، ده غير تشغيل وتدريب عمالة بكثافة عالية.

ونص مشروع القرار كمان على إلتزام الشركة بتصدير نسبة لا تقل عن 100% من حجم إنتاجها سنوياً إلى خارج البلاد، بخلاف استخدام مكون محلي في منتجاتها بنسبة لا تقل عن 50% خلال مدة أقصاها ثلاث سنوات من تاريخ بدء التشغيل.
لغاية هنا خلص بيان الحكومة الرسمية ونيجي بقي لتحليل اللي حصل.. أولا كل الحكومات اللي قبل كده ارتكبت خطأ جسيم بعدم استغلال الجغرافيا المصرية والامكانيات السياحية وطبيعي بلد بحجم مصر عنده حوالي ألفين كيلو متر من الشواطيء وعنده مواني كتير وترسانات تصنيع سفن عريقة يهمل ملف زي ملف تصنيع القوارب واليخوت الفاخرة واللي بقت صناعة عالمية بستوعب استثمارات بمليارات الدولارات كل سنة.
النهاردة حكومة مدبولي بتصحح غلط السنين بخطوة على الأرض هتوفر ملايين الدولارات كل سنة للدولة من تصنيع القوارب واليخوت وبيعها للخارج ودا سوق ضخم جدا في العالم ومصر خلال كام سنة هتبقي رائدة فيه لو مشيت بخطوات علمية مدروسة زي اللي حصل نهاردة.
ونروح للغة الأرقام اللي مابتكدبش  هنلاقي إن قيمة سوق تأجير اليخوت بس وتأجير كمان وصل 18.9 مليار دولار أمريكي في 2021، ومن المتوقع يوصل 26.5 مليار دولار أمريكي بحلول عام 2027، وده معناه إن الصناعة دي واعدة ومربحة من كل الاتجاهات.