ممعكش رأس مال وملكش في القروض.. إزاي تخترع دخل كويس جدا لبيتك
ناس كتير مننا مش معاها راسمال كبير تبدأ بيه مشروع معقول.. وفي نفس الوقت مش عاوزة تدخل في دوامة البنوك والقروض والخوف من عدم السداد.. طيب ممكن تعمل أيه عشان تزود دخلك بشكل معقول وتبقي صاحب مشروع كمان ومن غير مقر اداري ومن غير رأس مال كمان.. شوف الفيديو للآخر جايز يغير حياتك
طبيعي مع الايام مصاريفك ومصاريف بيتك بتزيد والاسعار بترفع واكيد دخلك بيقل قصاد اي ارتفاع كبير في الأسعار أو الالتزامات والاولاد والمدارس وغيرها وعشان كده كلنا بتفكر ازاي نزود دخلنا وكتير مننا بيشتغل في اكتر من شغلانة أو مكان في مهنته او حتي في غير مهنته عشان يوفر حاجة بيته ومصاريف ولاده لكن في نفس الوقت فيه ناس بتفكر بره الصندوق وبتزود دخلها بطرق تانية خالص وبأقل التكاليف الممكنة.. طيب زي ايه مثلا .
شوف لو عندك حد في البيت ليه في شغل الهاند ميد يبقي انت اقتحام باب رزق كبير وده لأن النوع ده من المهن أو الموهبة بيكون مؤهل لعمل مشروع مضمون المكسب وكل اللي عليك انك توفره المواد الخام وتبدأ تسوق الشغل على جيرانك واهلك واصحابك وبعدين توسع دايرة التسويق لأكبر من كده وتدخل على التسويق الالكتروني وده لان شغل المنتجات اليدوية مطلوب وبيتباع بسرعة وقرشها كويس وتقدر تدير مشروع وانت في البيت من غير ما تحتاج لمقر اداري ولا موظفين ولا اي رأس مال كبير وخاصة في البداية لأن بعدين وبعد ما تكسب كويس ممكن تحول المشروع لمصنع متوسط او صغير وتجيب ناس ليها في نفس المهنة ومشروعك يكبر مع الايام.
كمان تقدر تعمل مشروع اكل بيتي وتبيعه في اكتر من مكان وده مشروع ثبت نجاحه كتير وبيكون فيه ثقة عن اكل المطاعم كمان وفيه حاجة تانية نجحت مع ناس كتير زي بيع الملابس عن طريق الإنترنت وصفحات التسويق وده مش محتاج منك غير موبايل ونت وحد يوصل الطلبات اللي بتطلبها الناس من صفحتك وده مشروع مفيهوش نسبة مخاطرة تقريبا ونجح مع اغلب الناس اللي اشتغلت فيه وعلى فكرة في شباب وفتيات كتير شغالة دلوقتي في المشروع ده ونجحت بشكل كبير جدا وبعد ما كانوا بياخدو مصروف من أهاليهم دلوقتي بقوا أصحاب رأس مال ومشروع ومعاهم فلوس كمان وغير الخبرة الكبيرة اللي اتعلموها من نشاطهم التجاري.
القصد أن العقل مليان أفكار واللي ممكن تغير حياتنا للأفضل بس احنا ندور على مشروعات نعملها وخلي بالك اكتر مليارديرات العالم بدأو من الصفر واشتغلوا في حاجات وافكار عمرك ما تتخيل انها توصلهم في النهاية لقايمة أثرياء العالم واهم حاجة يكون عندك طموح وتقدر تتحرك وحماس ونشاط وصبر كتير عشان تقدر توصل اللي انت عاوزه واللي كمان متحلمش بيه لأن التجارة بتفتح قدامك ألف باب وباب وبتلاقي نفسك بعد شوية في حتة تانية خالص انت نفسك مكنتش مخطط ليها.
