محتار تحط فلوسك في وديعة ولا تشتري صناديق الاستثمار؟.. اعرف كل حاجة في هذا التقرير

يا ترى أعمل وديعة ولا احط فلوسي فى صناديق استثمار؟ واية اللى هيحققلي مكاسب اكبر؟ وايه الفرق بين الاتنين؟

 
ناس كتير بتقع فى حيرة كبيرة جدًا بين الودائع وصناديق الاستثمار، وبتكون ماتعرفش ايه الفرق بينهم وايه اللى يقدر يفيدهم اكتر؟ ..
وفى بانكير زي ما عودناكم دايما هنقول لحضراتكم الفروق بين كل منتج مصرفي وحضراتكم تختاروا اللى يناسبكم.

والوديعة وبكل بساطة عبارة عن فلوس أنت بتديها للبنك، والبنك بيقوم باستثمارها وبتاخد عليها عائد، وبتكون مدتها أقل من الشهادة واللى بتكون فى الغالب مابتزيدش عن سنة وفى بعض البنوك سنتين.. بس الغالب أنها بتكون مدتها اسبوع أو وديعة مدتها شهر يا إما وديعة مدتها 6 شهور أوسنة.
وبالنسبة للودائع فى البنوك فالعائد بيتحدد حسب نسبة الفايدة اللى بيحددها البنك وبتقدر تستفيد من النسبة دي فى فترات قريبة علشان مدة الودائع مش طويلة.
نيجي بقى لصناديق الاستثمار، وصناديق الاستثمار بكل بساطة عبارة عن استثمار فلوس بيتم تجميعها من عدد من الحسابات البنكية، والبنك بيعين مدير صندوق وبيبدأ فى استثمارها، واللى بيتم استثمارها فى أذون خزانة أو شهادات أو ودائع.
وعائد الصناديق بيتباين ما بين 9.5% أو 10.5%، واللى بتكون أعلى من الوديعة، وتقدر تبيع وثيقة الاستثمار بسعر اليوم، يعني مابتخسرش أى حاجة، ولازم تكون عارف أن فى بعض الصناديق ماينفعش تفكها فى أى وقت لازم يكون أول يوم فى الشهر، وبعد ما وضحلك الفرق وازاى تستفيد من الاتنين تقدر دلوقتي تقرر براحتك.