مليار دولار هدية بوتين لمصر.. ورعب في سوق الدهب.. والجنيه يضرب الدولار بصفقات جديدة
متابعينا الكرام في كل مكان أهلا وسهلا بكم على منصات بانكير وتحليل جديد لأهم التقارير اللي سجلتها وحدة أبحاث بانكير على مدار اليوم الخميس 4 أبريل 2024
البداية مع تقرير مهم جدا وهو بيتعلق بمشروع روسي كبير في السوق المصرية وبحجم استثمارات اولية مليار دولار.
وقال التقرير إن الحكاية بدأت مع شركة إنفينتي الروسية ودي شركة عالمية في مجال التنقيب عن الدهب والمعادن وشغالة في قطاع التعدين.. المهم الشركة الروسية الشهيرة قررت تضخ استثمارات في مصر بقطاع التعدين بحوالي مليار دولار، وده بعد الإعلان عن مزايدة عالمية للدهب في مصر طرحتها شركة شلاتين للثروة المعدنية، مستهدفة مناطق غنية بالدهب في مصر زي البرامية وحماطة، واللي تم التأكيد على إمكاناتها الواعدة في مجال الدهب.
وكشف التقرير إن انفينتي الروسية فسرت سبب استثماراتها الجديدة في مصر وقالت إن المزايدة للتنقيب عن الدهب في مصر متميزة ومحورية ومميزة في سلسلة المزايدات العالمية للتنقيب عن المعدن الاصفرغ، خصوصاً في منطقة الصحراء الشرقية المصرية الواعدة، واللي بتعتبر من أهم وأغنى مناطق الدهب في مصر والأعلى في نسب الاستخلاص.
الشركة الروسية ناوية كمان تطلق برنامج تدريبي مكثف في مصر بيستهدف آلاف العاملين في القطاع التعديني المصري، وبتستهدف توطين صناعة التعدين في مصر وده الأهم في المشروع.
التقرير التالي اللي قدمته وحدة بانكير كان خاص بمفاجأة مدوية في بنوك مصر..
وكشف التقرير إنه وفقا لبيانات رسمية حديثة صادرة عن البنك المركزي المصري ارتفع إجمالي الودائع بالعملات الأجنبية في البنوك المصرية بقيمة 1.1 مليار دولار خلال فبراير اللى فات .. وارتفعت أرصدة ودائع العملاء بالعملات الأجنبية إلى 50.8 مليار دولار خلال فبراير مقابل 49.7 مليار دولار في يناير .
و الزيادة في الودائع بالعملات الأجنبية هي الأعلى على الإطلاق وجت بالتزامن مع توقيع مصر أكبر صفقة استثمارية مع الإمارات بقيمة 35 مليار دولار لتطوير مدينة رأس الحكمة.
وحسب عدد من المسئولين فى البنوك المصرية ارتفاع ودائع العملاء بالعملات الأجنبية راجع لأسباب كتيرة منها توقف المضاربات وتراجع سعر صرف الدولار في السوق الموازي بمعدلات كبيرة خلال النص التاني من فبراير وقبل خفض قيمة الجنيه وده دفع العملاء للاحتفاظ بمدخراتهم بالبنوك مرة تانية.
التقرير التالي معانا ببيتكلم عن دعم قوي للجنيه وضربة للسوق السودا وحكاية الـ 18 مليار دولار اللي أنعشت خزينة المركزي
وشرح التقرير إنه فى الربع الأول من 2024 ضخ المستثمرين الأجانب 18 مليار دولار في أدوات الدين الحكومية وبلغت قيمة مبيعات الأجانب 5.6 مليار دولار خلال الفترة فيما بلغ صافي مشترياتهم 12.2 مليار دولار.
وحسب التقرير زاد إقبال المستثمرين الأجانب على شراء أدوات الدين المصرية للاستفادة من سعر الصرف وده خفض العائد على الأدوات في وقت الحكومة مش عاوزة تحمل نفسها أعباء إضافية من الديون.
وشرح التقرير معني أذون الخزانة وقال هي أدوات مالية بيطرحها البنك المركزي المصري نيابة عن وزارة المالية بشكل دوري أسبوعيا بهدف مساعدة الحكومة على تمويل عجز الموازنة العامة وتلبية احتياجاتها.
وفي السنة الحالية رفعت وزارة المالية المصرية تقديراتها لأسعار الفائدة على أذون الخزانة والسندات الحكومية لتصل إلى 23.5 % خلال تقريرها نصف السنوي مقابل 18.5 % كانت بتتوقعها وقت إعداد الموازنة العامة اللي اقرها البرمان مؤخرا.
منصات بانكير قدمت تقرير مهم عن مستقبل سوق الدهب وأنسب الأوقات للشراء والاستثمار في السوق.
وأكد التقرير إن الدهب لسه بيعتبر أكتر ملاذ آمن الناس بتلجأ ليه فى وقت الأزمات زي اشتعال الصراعات العسكرية في العالم والكوارث التجارية والمالية الدولية وعشان كده فى اخر سنتين ومن بعد اندلاع الحرب الروسية الاوكرانية فيه نهم شديد عند المستثمرين والناس العادية وحتى البنوك المركزية لحيازة كميات كبيرة من الدهب ووضع المدخرات فى سبايك او مشغولات وده خلا أسعار المعدن النفيس تقفز قفزات جنونية
وقال التقرير إنه وفى الساعات اللى فاتت ارتفع سعر الدهب عالميا إلى مستوى قياسي جديد وواصل ارتفاعه المستمر لمدة أسبوع بعد ما أكد رئيس الاحتياطي الفيدرالي جيروم باول أنه هيكون من المناسب على الأرجح البدء في خفض أسعار الفائدة في وقت من الوقات خلال 2024
وبتظهر أحدث البيانات جمعها مجلس الذهب العالمي أن البنوك المركزية واصلت زيادة حيازاتها من الدهب في فبراير وإن كان بوتيرة أبطأ من قبل كده لكن لسه النسبة عالية جدا وكفاية تعرف ان البنوك المركزي حول العالم اشترت حوالى 19 طن دهب فى فبراير اللى فات
طب تأثير ده ايه على سوق الدهب فى مصر؟
طبعا هيكون ليه تأثير قوي جدا على سوق المع\ن النفيس والأسعار هترجع ترفع تاني بشكل ملحوظ ولو مشيت الأمور وفقا لتوقعات الخبراء فاحنا بنتكلم عن وصول الدهب عالميا الى 3000 دولار للأونصة وده معناه وصوله لمستويات تلامس الـ 5000 جنيه للجرام الواحد محليا يعنى زيادة بأكتر من 70% مرة واحدة عشان كده أى حد بيفكر يشترى دهب ياريت ما يترددش ابدا خصوصا لو الفلوس اللى معاه مش محتاجها لفترة طويلة أكتر من سنة.
واختتم التقرير بالتأكيد على إن انسب وقت لشراء الدهب هو في الوقت الحالي لأنه متوقع سعره يزيد على مدار الايام والشهور الجاية عالميا وأكيد بردوا إن السوق المحلي هيتأثر بشكل مباشر والأسعار هترفع.
