إيه اللي هيحصل لأسعار الأدوية في مصر؟.. 3 سيناريوهات مقترحة
من بعد تحرير سعر صرف الجنيه وفقا لآليات السوق والارتفاع الكبير اللى حصل فى سعر الدولار الرسمي فى البنوك وشركات الصرافة المعتمدة من البنك المركزي وفيه كلام كتير عن رفع أسعار الأدوية خصوصا ان تكاليف الاستيراد زادت 50% مرة واحدة والأدوية اللى كنا بنستوردها على سعر 31 جنيه للدولار بقت بتستور على حوالى 48 جنيه للدولار.. فيا ترى ايه اللى هيحصل لأسعار الأدوية فى مصر الفترة الجاية؟ والأسعار ممكن تويد بنسبة كام ؟
من كام يوم كان فيه اجتماع مهم جدا بين شعبة الأدوية باتحاد الغرف التجارية وهيئة الدواء المصرية عشان يشوفوا هيعملوا ايه فى اسعار الأدوية الفترة الجاية بعد ارتفاع سعر صرف الدولار الرسمي والهيئة أبلغت شعبة الأدوية في الاجتماع انها بتدرس جميع السيناريوهات والطلبات المقدمة من ممثلي الشركات العاملة في السوق المصرية لتحريك أسعار الأدوية، ونسب الزيادة المقترحة عليها، وأوضاع السوق تمهيداً لاتخاذ قرار بشأنها خلال الفترة الجاية.
ورغم ان الهيئة محددش مهلة معينة للانتهاء من الدراسة لكن التوقعات بتقول انها هتستغرق مش اقل من شهرين على الاقل وبعدها هيتم عرض الملف بالكامل على مجلس الوزراء للموافقة على القرار قبل بدء التطبيق الفعلي واللي ممكن يستغرق فترة تتراوح بين 4 و6 شهور.
وحاليا بيتم دراسة اكتر من سيناريو للتعامل مع الأزمة وتلقت هيئة الدواء مقترحات جديدة لتحريك أسعار الأدوية واحد منها شايف انه يتم تحريك كل الأدوية المتداولة في السوق بنسبة تتراوح بين 30 و40%، على 4 مراحل خلال عام كامل بواقع 25% من الأدوية كل 3 شهور.
فيه كمان مقترح تاني بيتضمن زيادة أسعار 3 آلاف مستحضر بس بنسب متفاوتة تتراوح بين 30 و80% وتثبيت أسعار باقي المستحضرات من غير تغيير.
والمقترح التالت بيتضمن تحريك أسعار 1500 مستحضر على 3 مراحل بواقع 500 مستحضر في كل مرحلة بنسبة تتراوح بين 25 و30%.
والسيناريو التالت هو الأقرب للتنفيذ وبنسبة كبيرة هو اللى هتقره هيئة الدواء فى الفترة الجاية واللى هيتضمن تحريك 10% من الأدوية المتداولة في السوق واللى بتتجاوز 17 ألف مستحضر.
وفي 2016 قامت الحكومة بتحريك أسعار 7 آلاف دواء بنسبة 20% دفعة واحدة، وفي 2017 تم تحريك أسعار 3 آلاف دواء بنسبة تتراوح بين 40 و50%.
وزي ما كلنا عارفين الأدوية واحدة من السلع اللى بتخضع للتعسيرة الجبرية زيها زي الوقود والخبز.. وما بيتمش تحريكها الا لو حصلت مستجدات جديدة فى سعر صرف الجنيه أمام العملات الأجنبية التانية
