ليه الدهب حقق خساير كبيرة فى آخر 3 شهور.. هنقولك اللي حصل في الكواليس
يا ترى ليه الدهب حقق خساير كبيرة فى الربع الأول من 2024 ؟ وهل تحركات المركزي الأخيرة ليها علاقة بالموضوع ولا لأ؟ وايه التوقعات بخصوص مستقبل الدهب الفترة الجاية؟ وازاى السعر عالميا بيزيد وعندنا فى مصر بيتراجع؟
بعد موجة من الارتفاعات القياسية في أسعار الدهب بالسوق المصرية خلال 2023 بدأت الأسعار في التراجع لتسجل خساير تقترب من 3% في نهاية تعاملات الربع الأول من 2024.
طبده حصل ليه ؟
بص يا سيدي من بعد قرارات البنك المركزي التاريخية فى الاجتماع الاستثنائي للجنة السياسة النقدية فى 6 مارس اللى فات سواء بتحرير سعر صرف الجنيه وفقا لآليات السوق او رفع الفايدة 6% مرة واحدة وسوق الدهب شهت استقرار ملحوظ وبدأ المعدن النفيس رحلة الهبوط تدريجيا
ووفقال للبيانات المتاحة تراجعت أسعار الدهب خلال الربع الأول من 2024 بنسبة 2.7%، في حين ارتفعت الأونصة بالبورصة العالمية بنسبة 8.2%، مدعومة بالتوترات الجيوسياسية وتزايد التوقعات بخفض الفيدرالي الأمريكي لأسعار الفائدة منتصف 2024 او فى يوليو على أقصى تقدير
وتراجعت أسعار الدهب بالأسواق المحلية بقيمة 85 جنيه خلال تعاملات الربع الأول من العام الجاري.. وكان سعر جرام عيار 21 في مطلع 2024 عند مستوى 3175 جنيه ووصل بعدها فى ارتفاع جنوني الى مستوى 3900 جنيه لكنه أنهى تعاملات الربع الأول عند مستوى 3090 جنيه مع نهاية مارس.
ورغم انخفاض اسعار المعدن النفيس فى مصر الى أن الأونصة ارتفعت بالبورصة العالمية بحوالى 171 دولار.. وافتتحت التعاملات عند مستوى 2062 دولار واختتمت تعاملات الربع الأول عند مستوى 2233 دولار.
طب الكلام ده معناه ايه ؟ وهل كده الاسعار هتنزل ولا هترفع ؟
على المستوى العالمي معظم التوقعات بتقول ان سعر الدهب هيرتفع بشكل ملحوظ وانه ممكن يتخطى مستوى الـ 2300 دولارفى ظل استمرار التوترات السياسية فى عدد من مناطق الصراع الملتهبة وكمان فى ظل اتجاه الفيدرالى لتخفيض اسعار الفايدة على الدولار وده هيخلى الدهب اختيا افضل للمستثمرين
أما فى مصر فالأوضاع مختلفة شوية لأن سعر المعدن النفيس مرتبط اكتر بسعر الدولار وحركته صعودا او هبوطا معتمدة بشكل كبير على سعر العملة الأمريكية يعنى لو الدولار سعره نزل ده هيسمع فى اسعار الدهب ولو طلع برضوا هيسمع
