هو الدولار ممكن يوصل فوق الـ50 جنيه تاني في البنوك.. وليه؟
الدولار رجع زاد تاني بعد انخفاضه بعد قرار التعويم من أعلى نقطة ليه 51 جنيه واستقر في نهاية تعاملات امبارح الثلاثاء عن 48 جنيه.. إيه اللي حصل وإيه أخر سعر ممكن الدولار يوصله وامتي.
طبعا قبل قرارات التعويم كان معروف إن فيه أكتر من سعر للدولار بداية من سعر البنوك الثابت وسعر دولار الدهب والحديد وضيف عليهم سعر تاني لدولار الجمارك والاستيراد ودولار السوق السودا وده اللي كان عامل الفوضى في الأسعار والاسواق وبعد قرار تحرير سعر الصرف الوضع اختلف تماما وانتهت السوق السودا للدولار تقريبا وبقي سعر العملة الأميريكية حر في البنوك حسب العرض والطلب.
ولأن العملة بتخضع للعرض والطلب دلوقتي يبقي مصيرها بقي في إيد الأسواق مش تحت سيطرة أو تحكم البنك المركزي أو الحكومة أو أي جهة وان عملية السيطرة الوحيدة على الدولار من خلال حاجة واحدة بس هي توفير معروض مناسب وأكتر من الطلب على العملة وبكده الدولار هينزل قدام الجنيه وعشان تبقي عارف أي زيادة في سعر الدولار في البنوك دلوقتي إن فيه حاجتين حصلوا أولها ان السحب على الدولار أو الطلب زاد وفيه نفس الوقت فيه نقص في المعروض أو أسباب تانية ليها علاقة بأزمات اقتصادية واحنا لسه موصلناش للمرحلة دي وطلوع ونزول الدولار لسه بمستويات بسيطة.
ده غير إن مسألة التدفقات الدولارية دي محسومة وهتدخل البلد لانها باتفاقيات سواء قرض صندوق النقد الدولي أو التمويلات الأوربية أو حصيلة الاستثمارات الأوربية ودا غير إن الدولة فككت جزء كبير من أزمة الدولار في حل أزمة الافراجات الجمركية ودا ساعد في تقليل الطلب على الدولار رغم إن الدولة دفعت مبلغ محترم عشان تفرج عن البضايع وكمان الدولة دفعت 20% من مستحقات شركات البترول العالمية وكل ده بالدولار وبخلاف اجرااءت تانية لتعظيم الاحتياطي الاستراتيجي من السلع عشان يبقي فيه أمان اقتصادي أكتر في البلد والدولة تتحكم أكتر في الاسواق عشان الأمور ماتخرجش عن السيطرة.
اللي عاوزين نقوله إن الدولار لسه فوق السيطرة وان سعره يرفع حتي فوق ال50 جنيه دي شيء عادي جدا وبيكون ساعتها حكم السوق لأنه بعدها بنص ساعة ممكن يرجع ل40 جنيه وهي زي ما قلنا تداولات بيحكمها السوق مش الحكومة بس اهم حاجة تكون الدولة عاملة حسابها كويس جدا إن ما يحصلش أزمات في تدفق العملة الأميريكية للسوق المصري والبنوك وهنا بس ممكن نخاف إن الدولار يرجع يضرب تاني.
