تطور جديد في ملف الدولار..إيه اللى بيحصل في سوق الصرف؟

فيه تطور جديد حصل فى سعر الدولار فى الساعات الأخيرة بيحصل لأول مرة بعد قرار تحرير سعر صرف الجنيه وفقا لآليات السوق.. فيا تارى ايه التطور ده ؟ وايه تأثيره على سعر صرف العملات الأجنبية ؟ وهل ممكن الدولار سعره ينخفض لحدود الـ 40 جنية خلال الأيام الجاية؟

يوم 6 مارس اللى فات البنك المركزي خد مجموعة من القرارات التاريخية لضبط سوق صرف العملات الأجنبية كان من بين القرارات دي تحرير سعر صرف الجنيه وترك تحديد سعره وفقا لقوانين العرض والطلب بالاضافة الى رفع الفايدة 6% مرة واحدة ومن بعدها قررت البنوك طرح شهادات ادخار بفايدة مرتفعة وصلت الى 30%.. وطبعا الاجراءات دي كان ليه تاثير قوي جدا على سعر الدولار وعلى السوق السودا لصرف العملات واللى كانت نشطت بقوة فى الشهور الأخيرة لدرجة ان سعر العلة الأمريكية وصل الى 70 جنيه لكن مع ضربات المركزى الأمور اتغيرت تماما ومع الساعات الأولى لاعلان تحرير سعر الصرف وصل سعر الدولار فى البنوك الى 50 جنيه واختفت تماما المضاربات على الدولار وشوية بشوية بدأ يحصل ضبط للسوق وبدأ الدولار سعره ينزل

طب ايه التطور اللى حصل فى سوق الصرف فى الساعات الأخيرة ؟

من أول ما صدر قرار البنك المركزيبتحرير سعر الصرف وسعر الدولار ما نزلش عن 47 جنيه وده وفقا لآخر تداولات على العملة لكن فى الساعات الأخيرة هبط السعر الى اقل من 47 جنيه وحاليا بيتم تداول الدولار فى البنوك وشركات الصرافة فى حدود 46 جنيه ونص تقريبا وسط توقعات قوية بان سعر العملة الأمريكية ينزل الى اقل من 45 جنيه خلال ايام قليلة جدا مع زيادة التدفقات الدولارية وقدرة البنوك على تلبية طلبات الشركات والمستوردين وكمان مع زيادة عمليات التنازل عن الدولار فى البنوك وشركات الصرافة

يعنى ممكن الدولار ينزل الى حدود 40 جنيه الفترة الجاية ؟

حاليا زي ما قولنا سعر الدولار حر ومتروك لقوانين العرض والطلب وكل المؤشرات بتقول ان فيه وفرة حاصلة فى السيولة النقدية من العملات الأجنبية وطبعا كل ما زاد المعروض هيقل الطلب والسعر هينزل بس هيوصل لفين محدش يعرف وان كانت معظم توقعات مؤسسات التمويل الدولية بتقول ان السعر العادل للدولار ما بين 40 الى 45 جنيه وطبعا وارد جدا سعر العملة الأمريكية ينخفض الى حدود 40 جنيه خصوصا لو الدولة استمرت فى برنامج الاصلاح الاقتصادي اللى بتنفذه وقدرت تحرز تقدم فى ملف الطروحات الحكومية