ألاعيب حيتان الصاغة رجعت من تاني.. إيه اللى بيحصل في سوق الدهب؟

يا ترى ايه اللى بيحصل فى سوق الدهب فى الكام يوم اللى فاتوا؟ وليه حيتان الصاغة رجعوا يمارسوا ألاعيبهم من جديد؟ وايه السعر العادل لجرام الدهب فى مصر؟

فى الساعات الأخيرة أسعار الدهب بتتعرض لارتفاعات غير مبررة بالمرة  والأسعار المعلنة من تجار الصاغة غير عادلة خصوصا مع تراجع سعر صرف الدولار واستقرار سعر صرف العملة الأمريكية فى البنوك واختفاء المضاربات عليها فى السوق السودا.

وفى وقت تجاوز فيه سعر جرام الدهب عيار 21 الأكثر انتشارا فى مصر 3 الاف جنيه معظم الخبراء شايفين ان السعر العادل للجراملا يتجاوز 2850 جنيهً على أقصى تقدير وان الزيادة عن السعر ده بتروح جيوب حيتان الصاغة خصوصا الارتفاعات الأخيرة في البورصة العالمية غير مؤثرة في ظل انفصال السعر المحلي عن العالمي لأن سعر صرف الدولار هو  العامل المؤثر على سعر الدهب وكلنا شفنا ازاى لما سعر الدولار فى السوق السودا تخطى ال 70 جنيه سعر الدهب كان قريب من حاجو ال 4 الاف وبالتالى نزول الدولار الى 47 جنيه لازم يتبعه هبوط أكبر من الموجود فى اسعار الدهب

طب ليه بيحصل كده فى سوق الصاغة؟

السبب الرئيسي فى اللى بيحصل ان سوق الدهب فى مصر بيسعر بشكل عشوائي ومفيش اليات ولا معايير واضحة لتسعير المعدن النفيس والموضوع فى الاول والاخر خاضع لأهواء ومصالح مافيا كبيرة بتتحكم فى السعر ولأن مفيش رقابة كافية من الحكومة الأسعار ساعات تضرب لفوق اوى وساعات تفضل فى المنطقة العلى من السعر العالمي

طب هل الدهب هينزل تانى عن كده ولا هيفضل يزيد ؟

على المستوى العالمى فيه اتجاه صعودي للدهب وسعر الاونصة تخطى ال 2200 دولار فى اخر تعاملات ومتوقع كامن عالميا يحصل ارتفاعات جديدة لكن على المستوى المحلى المفروض الاسعار تنزل عن كده شوية خصوصا ان فيه توقعات قوية بان سعر الدولار هيهبط لمستوى اقل من 45 جنيه خلال ايام قليلة وطبعا مع نزول الدولار المفروض الدهب هو كمان ينزل لأن سعره مربوط بسعر الصرف