مزور واضحك عليك.. مصيبة جديدة في بيوت تجار العملة
ايه المصيبة اللي اكتشفها تجار العملة بعد انهيار السوق السوداء للدولار وايه حكاية ملايين الخسائر اللي اتعرضولها وحكاية الدولارات اللي غرقت السوق واختفت من تاني.. الحكاية مليانة تفاصيل..
قبل ما قرار البنك المركزي بتحرير سعر الصرف واللي كان صدمة العمر لتجار العملة كانت السوق السوداء للدولار سداح مداح من كل حتة ملايين وملياارات دخلت وخرجت ومحدش عارف أصلها ايه وجت منين وراحت فين لكن كانت كلها مكاسب وملايين الملايين لتجار العملة واللي الدولارات سعرتهم و وقعوا فريسة للطمع والجشع وحب المال حتي لو كان حرام وعلى حساب الناس بدون استثناء واخترعوا دولار الدهب ودولار للسلع ودولار للحديد ودولار للسكر ودولار لكل حاجه سعرها بيزيد بشكل جنوني والناس عرفت الرد إنه الدولار هو السبب .
انتهت وراحت السوق السودا للدولار لكن تجار العملة بعد فترة ولما افتكروا أنهم عملوا خميرة جامدة خدوا صدمة العمر ليه بقي لأن كتير من الدولارات اللي معاهم طلعت مزورة ومجمدة وهي الدولارات اللي قلنا عليها في الأول ظهرت مرة واحدة وبمبالغ كبيرة جدا وفجأة اختفت ودلوقتي تجار العملة بيضربوا كف على كف على مصيبتهم وزي ما قلنا الطمع يقل ما جمع وادي أخرة التجارة الحرام وأنهم كانوا سبب مباشر في غلاء المعيشة على الناس.
طيب الدولار المزور دخل ازاي السوق السودا.. مفيش شك حالة الطمع الكبيرة عند تجار العملة والطمع مخلهمش يدققوا في الدولارات اللي معاهم ويكتشفوا إنها مزيفة أو مجمدة أو ممنوعة من التداول ومبلغ بيها في البنوك وشركات الصرافة وشفنا حالات كتير لدولارات مزورة ومجمدة اكتشف أصحابها أنها مزورة وكتير منهم محدش لباله زي الراجل اللي راح يغير مبلغ من الدولارات في البنك واكتشف أنها مزورة وقال إنه جابها من تاجر في السوق السوداء.
