لو عاوز تستثمر.. مصير الدهب بعد تثبيت سعر الفائدة

هو سوق الدهب رايح على فين بعد قرار البنك المركزي المصري والفدرالي الأمريكي بتثبيت سعر الفائدة.. وايه أفضل وقت للاستثمار في الدهب.. خليكم معانا للآخر.

كلنا عارفين إن الدهب بيعتبر عملة وفلوس مش مجرد معدن وقيمته بتساوي أموال في الاحتياطي النقدي للبنوك المركزية وعشان كده بيخضع سعره لعوامل كتير جدا وعلشان كده بردو بيكون من الصعب التنبؤ بأسعار الدهب لفترات طويلة لأن بيكون سعره ومصيره مرهون بالظروف الدولية.. يعني لو حصل حرب أو صراع أو وباء أو أزمات اقتصادية ومالية في العالم سعر الدهب بقفز لأن الطلب عليه بيزيد جدا لانه ساعتها بيكون أهم ملاذ آمن وطوق نجاة للدول والبنوك المركزية والافراد كمان لحفظ قيمة أموالهم.

كمان الدهب بيكون سعره مرهون بأسعار الدولار الأمريكي عالميا وكل ما الدولار بيزيد مثلا سعر الدهب بينزل ولو نزل سعر الدولار الدهب بيرفع بشكل تلقائي وكمان فيه نسبة العرض والطلب العالمي واللي بيكون ليها تأثير في سعر الدهب بشكل كبير ومثلا لما البنوك المركزية العالمية بدأت تشتري الدهب بكميات كبيرة بعد الأزمة الروسية سعر المعدن الأصفر ارتفع جدا ولما البنوك تبدأ تبيع جزء من الاحتياطي الدهب عندها سعره بينزل في العالم كله.

الصاغة المصرية مش بعيدة عن اللي بيحصل في العالم واسعار الدهب اكيد بتتأثر بردو بسعر الدولار عندنا ودي أهم حاجة بتحدد مسار اسعار الدهب في مصر بجانب العرض والطلب والمواسم وزي ما احنا عارفين أسعار الدهب نزلت بشدة بعد قرار التعويم وانتهاء زمن المضاربة علي الدولار وهبوطه في البنوك لأسعار معقولة بخلاف الممارسات الاحتكارية والتلاعب في الصاغة قبل ما الدولة تتدخل وتظبط السوق وتقبض علي التجار اللي بيخربوا .

أسعار الدهب عالميا زي ماقلنا مرهونة بالظروف اللي قلنا عليها وفي مصر نفس الأمر وعشان كده متوقع استقرار كبير في أسعار الدهب الفترة الجاية في الصاغة مع تثبيت أسعار الفائدة ومع استقرار الدولار والأوضاع الاقتصادية بشكل عام وطول مافيش أزمات مفاجئة تخلي الناس تجري تشتري دهب وتخزنه  وتستثمر فيه.

وعشان كده بنقولك إن الوقت مناسب للشراء دلوقتي والاستثمار في الدهب لأن قيمته بتزيد ولأن الأسعار دلوقتي افضل ما يكون عشان تشتري.

وبنفكركم إن البنك المركزي المصري قرر امبارح تثبيت أسعار الفائدة عند مستويات 27.25%.و 28.25% للإيداع والإقراض على الترتيب.