طوارئ في الصاغة وتوقعات بأسعار فلكية للدهب.. إيه اللي هيحصل ؟

 

ياترى ليه أسواق الدهب في العالم حابسة أنفاسها النهاردة وايه القرار اللي ممكن يحصل وليه  فيه توقعات مخيفة بخصوص اسعار المعدن الأصفر الفترة الجاية.. خليكم معانا وهنشوف كل حاجة للآخر..
 
لو متابع سوق الدهب في العالم على مدار الأيام الأخيرة هتعرف إن فيه حالة قلق واضطراب وفوضي كبيرة بسبب أزمات واضطراب الدولار وانتظار قرار البنك الفدرالي الأمريكي النهاردة الاربعاء وهل هينزل الفائدة ولا هيثبتها ولا هيرفعها لأن كل حالة في دول ليها تأثير مختلف على سوق الدهب في العالم وزي ما إحنا عارفين الدهب ماشي عكس الدولار دولياً يعني لما الدولار بيرفع الدهب بينزل ولو الدولار هبط الدهب بيضرب في السما ودي علاقة واضحة وقديمة لأن الدهب بيعتبر دولار في الاحتياطيات الدولية في البنوك المركزية.

وعشان نبسطها على حضراتكم اي  خفض من الفيدرالي لسعر الفائدة مش في مصلحة الدولار، وهيدفع المستثمرين في العملة الأمريكية للتخلص منها، لأن خفض سعر الفايدة يعني انخفاض قيمة العملة ، ومن هنا هيلجأ المستثمرين للدهب للحفاظ على قيمة أموالهم والتخلص ومن الاستثمار في الشهادات والسندات الدولارية.

ومن المتوقع على نطاق واسع أن يبقي بنك الاحتياطي الفيدرالي أسعار الفايدة دون تغيير في نطاق 5.25%- 5.50%، لذلك، وبكده هيكون التركيز الرئيسي على توقعات المستثمرين لمصير سعر الفايدة في اجتماعات بقية العام بعد المؤتمر الصحفي لجيروم باول.

طيب ايه هي توقعات أسعار الدهب عالميا من وجهة نظر المختصين والمؤسسات الدولية.. شوف يافندم الحقيقة فيه اكتر من عامل مؤثر في ارتفاع أسعار الدهب في الفترة الأخيرة، منها الاضطرابات السياسية والحروب سواء في أوكرانيا أو غزة وهجمات الحوثيين وتأثر الشحن عبر البحر الأحمر وقناة السويس لأن الدهب بيتأثر في أوقات التوتر والأزمات، وشايفين إن توقعات مستقبل هبوط الفايدة من قبل مجلس الاحتياطي الفيدرالي، هتقود لارتفاع الدهب عالميا.

كمان  من بين العوامل المؤثرة في الارتفاع زيادة البنوك المركزية من احتياطيات الدهب وسط الأزمات الجيوسياسية، واللي بتتزامن مع انخفاض الإنتاج عالميًا لنقص عدد المناجم المكتشفة، وإن الفترة الطويلة التي يحتاجها المنجم من الاستكشاف إلى الإنتاج تتراوح بين 6 إلى 7 سنوات، وذلك يؤدي بدوره إلى نقص متوقع في الإنتاج خلال السنين الجاية مع زيادة الطلب.
وتوقع الخبراء أن يستمر سعر الدهب في الارتفاع مع خفض سعر الفائدة خلال 2024 و2025، وارتفاع سعر أوقية الدهب بين 2500 إلى 3000 دولار.. ولو بتسأل عن مصير اسعار الدهب في مصر باللي بيحصل في العالم فأكيد مصر مش معزولة واللي بيحصل بره بيأثر بشكل مباشر عن أسعار الدهب في مصر ولو سعره زاد بره اكيد هيزيد في مصر لكن بدرجات وده بيتوقف على العرض والطلب كمان وسعر الدولار في مصر بعد التعويم.