دولارات من كل حتة.. ايه اللي بيحصل في الصرافة والبنوك

 القضاء علي السوق السودا كان واحد من اهم ابواب استعادة البنك المركزي للتحويلات الدولارية، وبعد خطة الحكومة لتوفير الدولار في البنوك واتاحته للموردين والتجار بسعره الرسمي في البنوك... دلوقتي مصادر الدخل الدولاري لمصر بقت مفتوحة من كل اتجاه.. يا تري اية مصادر الدخل الدولاري الجديدة للبنك المركزي.. واية اللي بيحصل دلوقتي من الحكومة علشان تعزز الدخل الدولاري لخزينة البنك المركزي
 

قرار الحكومة بخصوص توفير الدولار في البنوك واتاحته بسعره الرسمي قدام المستوردين والتجار بعيدا عن السوق السودا واحد من اهم القرارات اللي اخذتها الحكومة لحل ازمة نقص العملات الاجنبية في مصر، والقرار ده كان بمثابة شهادة وفاة السوق السودا تماما في مصر ودلوقتي في حالة من الاستقرار في احتياطات النقد الاجنبي في البنك المركزي.
بعد قرار الحكومة بتوحيد سعر الصرف في البنك المركزي والقضاء علي وجود سعرين للدولار في مصر، دلوقتي مصر بتعيش فترة ذهبية وفي تحويلات دولارية بتدخل بشكل يومي وبترتفع من يوم للثاني بعد ما الحكومة اخذت عزاء السوق السودا ومبقتش موجودة ولا في حاجة عندنا اسمها السوق السودا في التجارة بالعملات الاجنبية.
طيب اية هيا مصادر الدخل الدولاري لمصر بعد انتهاء وجود السوق السودا؟.
الدكتور مصطفي مدبولي رئيس مجلس الوزراء ال إن تحويلات المصريين العاملين في الخارج بدأت تعود تدريجيا إلى معدلاتها الطبيعية، خصوصا بعد انحسار السوق السوداء وعدم وجود فارق بين السعر الرسمي وسعر السوق السوداء بعد قرارات البنك المركزي الأخير بتحرير سعر صرف الجنية المصري بشكل كامل قدام الدولار .

رئيس مجلس الوزراء قال كمان أن الحكومة وضعت خطة لسداد مستحقات الشركاء الأجانب، والحكومة بدأت في الإفراج البضائع المركونة في الموانئ ووصل معدل الافراج الجمركي عنن البضائع لـ3 مليار دولار لحد دلوقتي.
طيب اية اللي بيحصل في تحويلات المصريين من الدولار للجنية المصري؟.
محافظ البنك المركزي حسن عبدالله قال أن البنوك ومكاتب الصرافة بدأت في استقبال المواطنين اللي هيقوموا بتحويل الدولار لجنيه مصري، ده غير التحويلات الكبيرة اللي بنقوم بيها شركات السياحة للجهاز المصرفي والحصول عليها بالجني المصري .
طيب اية هيا مصادر الدخل الدولاري لمصر اصلا، واية هيا خطوات الحكومة لزيادتها؟.
تحويلات المصريين في الخارج كانت للاسف واحدة من ابرز مصادر الدخل الدولاري لمصر من الخارج، واللي للاسف تراجعت بأكثر من 40% في الايام الاخيرة وبعد الهجوة الكبيرة ووصول سعر الدولار في مصر لـ70 جنيه في السوق السودا، وده قبل ما الحكومة تخلص عليها بالضربة القاضية.
ثاني اهم مصادر الدخل الدولاري لمصر من الخارج هيا قناة السويس المجري الملاحي الاهم في العالم، واللي للاسف هيا كمان تراجعت ايراداتها بشكل كبير بسبب الاحداث الاخيرة اللي بتحصل في الملاحة البحرية والحرب الدائرة بين قوات الحوثيين والقوات الأمريكية والبريطانية في البحر الاحمر، واللي اثرت علي حركة التجارة الدولية، واضطرت عدد كبير من حركة التجارة للابحار عبر طريق رأس الرجاء الصالح بعيدا عن الضربات المدفعية للمحافظة علي البضائع.
ثالث اهم مصادر الدخل الدولاري لمصر بالخارج كانت السياحة واللي تراجعت هيا كمان بسبب الاحداث السياسية الاخيرة وتاثرت بسبب قيام الحرب الروسية الاوكرانية خصوصا ان السوق الروسي والاوكراني كانوا من اهم الاسواق المصدرة لحركة السياحة في مصر، ده غير تاثير الحرب الإسرائيلية علي قطاع غزة علي حركة السياحة الوافدة لمصر من كل دول العالم .