جبال الدهب.. سر هجوم الشركات العالمية على الصعيد

 
ايه حكاية جبال الدهب في البحر الاحمر وليه الشركات العالمية بتتخانق على الاستثمار هناك وايه طبيعة الكنوز في المنطقة.. كل الأسئلة دي هنعرفها في الفيديو ده ..

 
الدهب معروف اللي اكتشفه أول مرة في التاريخ المصريين القدامي واخترعوا كمان طرق استخراجه وتنقيته وتشكيله وسبقوا العالم في كل ده ولدرجة كتب التاريخ كانت بتقول إن الدهب في مصر كان في كل حتة زي التراب وعشان كده حكاية المصريين مع الدهب حكاية خاصة على مر السنين ومعروف حرص المصريين على اقتناء الدهب والمشغولات وبقي جزء من ثقافة مصر..
نرجع بقي لقصة الدهب اللي زي التراب في مصر اللي سمعناها في الأساطير واكدتها كتب تاريخ تانية وكان المقصود بالدهب اللي زي التراب إن مصر عندها كنوز ومناجم وجبال دهب واللي اكتشفها الفراعنة من آلاف السنين ولسه موجودة لغاية دلوقتى والخلاصة أن مصر كانت أكتر دولة في ثروة من خام الدهب في العالم القديم وجي الوقت دلوقتي إن مصر ترجع تكتشف كنوزها ومناجمها الدهب من تاني وده اللي عملته حكومة الدكتور مصطفى مدبولي بعد 7 آلاف سنة من الاكتشافات الأولية لخام المعدن الأصفر.

زي ما احنا عارفين مصر طرحت اكتر من منطقة للتنقيب عن الدهب قدام الشركات العالمية ودلوقتي مثلا بتتنافس 4 شركات عالمية للفوز بالتنقيب عن الدهب بمنطقتين  بالقرب من منجم السكري، بمحافظة البحر الأحمر خلال أول مزايدة عالمية لمصر تطرحها شركة شلاتين للثروة المعدنية،  وبتضم قائمة الشركات.. شركة “لوتس جولد” الكندية، و”أنفينيتي” الروسية، و”مناجم النوبة” الإنجليزية، و”خطوات” السعودية، وكمان الحكومة طرحت مزايدة في مايو اللي فات للتنقيب عن الدهب بالصحراء الشرقية في مناطق: “فطيري”، و”البرامية”، و”عقود”، و”أم عود”، و”حماطة”. 
وبخصوص منجم السكري وهو واحد من أكبر مناجم الدهب في العالم النهاردة أنتج450 ألف أوقية دهب بنهاية 2023، مقابل 440 ألف أوقية العام الماضي في 2022 طبقاً لبيانات شركة سنتامين الإنجليزية المالكة للمنجم وهتوصل 500 ألف أوقية في السنة الحالية والحكومة حطت خطة طموحة لاستثمار مليار دولار في قطاع التعدين بحلول عام 2030. 

وعلى فكرة مصر عندها حوالي 270 موقع دهب، بينها 120 موقع ومنجم معروفين تم استخراج الدهب منهم قديما، وتتوزع إلى 4 قطاعات،  وأهمية الدهب في أي اقتصاد اي دولة إنه بيعتبر نقد زيه زي الفلوس لأن الدهب وعاء تحوط مهم جدا للدول في الأزمات وبيضاف قيمته للاحتياطي النقدي في البنوك المركزية