ليه عيار 21 هيوصل 5700 جنيه.. الدهب طالع ودا أفضل وقت تشتري فيه
هو ايه الي بيحصل في سوق الدهب اليومين دول وليه رجع يزيد تاني رغم انتهاء السوق السوداء للدولار والمضاربة في العملة وايه التوقعات الخطيرة عن أسعار الدهب الأيام والشهور الجاية.. وامتي أفضل وقت تشتري فيه.. كل ده هنجاوب عليه حالا خليكم معانا
الدهب زي ما احنا عارفين ليه قواعد بتحكم سعره في كل الاسواق العالمية وهي أنه ماشي عكس الدولار بمعني لو الدولار زاده سعره في الأسواق المالية الدولية يبقى سعر الدهب بينزل فورا في نفس الأسواق دي والعكس صحيح ولأن الدولار عالمياً سعره بينزل بعد توقعات عن انتهاء زمن رفع الفدرالي الأمريكي لسعر الفايدة وإن القرارات الجاية هتكون تخفيضها وانتهاء حالة القلق في الأسواق العالمية ولما الدولار نزل بدأت الدهب يطلع زي ما قلنا وفيه حاجة كمان بتحدد سعر الدهب في العالم بعيدا عن الدولار وهي حجم الطلب عليه وخاصة من البنوك المركزية اللي بتشتري كميات ضخمة من المعدن الأصفر وقت الأزمات زي ما حصل كده بعد الحرب الروسية الأوكرانية وبنوك مركزية اشترت كميات ضخمة زي المركزي الصيني والتركي والمصري ودا لأن الدهب نفسه بيعتبر دولار وبيدخل ضمن الاحتياطي النقدي بخلاف أنه أداة تحوط دولية في الأزمات.
والحقيقة سوق الدهب المصري مرت عليه اوقات صعبة جدا بعد ارتفاع أسعار كل العيارات لمستويات قياسية وغير منطقية بالمرة ووصل سعر جرام 21 ل4 إلاف جنيه وده عشان زي ما كلنا عارفين الدهب كان متسعر على دولار مخصوص ليه بسعر 65 حنيه وفي نفس الوقت كان فيه تلاعب كبير في الأسواق وعمليات تهريب وتنقيب والقبض على روماني عيسى كشف تفاصيل اللي ببحري من مخالفات في سوق الدهب وعمليات حجب الدهب وتقليل المعروض والتسعير الاجباري الدهب واللي فرضه حيتان الصاغة على باقي التجار ودي كانت ايام صعبة جدا في تاريخ سوق الدهب المصري.
ولأن الدهب كان متسعر على سعر الدولار في السوق السودا فكان متوقع سعره ينزل بعد قرار تحرير سعر الجنيه والدولار بقي حر وسعر واحد في البنوك وبيتداول بين 49 و50 جنيه وخلاص انتهت السوق السوداء لكن ده محصلش وكل الأسواق بدأت تخفض أسعارها ماعدا الدهب ودي فرض تساؤلات كتير لان المصريين مهتمين جدا بالظهر..واللي حصل إن أسعار الدهب سجل في بداية تعاملات 2024، ارتفاعات قياسية بالتزامن مع الصراعات في المنطقة والعالم وحالة عدم اليقين واللي خلق حالة من زيادة الطلب على الدهب ومن هنا بدأت البنوك الدولية والأسواق المتخصصة ترسم خريطة لمستقبل وتوقعات سوق الدهب في العالم ومصر جزء من العالم والهيئات دي توقعت أسعار الدهب في الفترة من ،2025 إلى 2030 ووصلت لنتيجة إن أسعار الدهب هتوصل لمستوى الـ 2,400 دولار بنهاية 2025، ثم إلى مستوى الـ 2,700 دولار بنهاية عام 2026. وبعدها هيزيد إلى مستوى الـ 3,000 دولار في سنة 2027، وهتوصل لمستوى الـ 3,500 دولار في سنة 2030 ومستوى الـ 4,000 دولار في 2033. ودي أحد أكثر التوقعات صعوداً لأسعار الدهب. للسنوات الخمس والعشر الجايين، أي أن عيار 21 سيصل لمستوى الـ 5700 جنيه بحلول 2030 . بأسعار الدولار الرسمي في مصر .
طبعا ومن غير ذكاء طالما الأسعار هتبقي كده لغاية 2035 يبقي اكيد دلوقتي افضل وقت لشراء الدهب وتخزينه والاستثمار فيه لانك كل ما تأخر قرار الشراء كل ما مكسبك ما يقل والعكس صحيح.
