أول قرار من وكالة فيتش بعد تعويم الجنيه ورفع سعر الفائدة

ياترى وكالة فيتش قالت ايه عن قرارات المركزي امبارح وايه هيكون قراراها بخصوص تصنيف مصر الائتماني في الفترة الجاية.. وليه اتحققت نبؤءة الوكالة وفي نفس المعاد.. خليكم معانا وهنعرف كل التفاصيل.
 

فيتش من بين أكبر 3 وكالات تصنيف ائتماني معتمدة في العالم وهي اكترهم مصداقية ورغم تقاريرها السلبية وتخفيض تصنيف مصر الائتماني قبل كده وكالة فيتش بالذات كان ليها توقعات غريبة وكلها تقريبا حصلت عن الاقتصاد المصري أولها أنها قالت إن مصر هتحرك سعر الصرف وهتعوم الجنيه لما الظروف تسمح في مطلع 2024 وده فعلاً حصل امبارح وقالت كمان إن سعر الجنيه بعد التعويم هيكون في حدود 45 و47 حنيه ومفيش سوق سودا وقالت كمان إن الحكومة هتقدر تجمع حصيلة دولارية ضخمة وإن الاقتصاد المصري معدل نموه هيزيد في السنة المالية 2024..2025  وإن نظرتها للاقتصاد المصري إيجابية بعد تصحيح الخلل في السوق المصري.

وكالة فيتش للتصنيف اتوقعت إنه بعد رفع سعر الفائدة بمقدار 600 نقطة أساس في 6 مارس، توقعت إن البنك المركزي المصري هيبقي على سعر العائد على الإقراض لليلة واحدة عند 27.25% وسعر العائد على الودائع لليلة واحدة عند 28.25% لبقية السنة وهي خطوة إيجابية تشير إلى جدية البنك المركزي المصري في خفض التضخم من وجهة نظر الوكالة.

في نفس الوقت وكالة  فيتش، شايفة إن العائدات على السندات الحكومية المصرية هتفضل ايجابية أيضًا، وده مع انحسار مخاطر صرف العملات الأجنبية، وإن ده هيجذب مستثمري المحافظ مرة تانية إلى سوق الديون المصرية حتى في وقت أبكر مما كان من المتوقع حدوثه...وقالت الوكالة في تقريرها عن مصر  أن المركزي المصري هيكون  عنده ما يكفي من العملات الأجنبية لسد الفجوة بسرعة مع سعر السوق الموازية المستخدم على نطاق واسع. 
طبعا اي كلام إيجابي من وكالات التصنيف الائتماني الدولية رغم موقفها السابق من الاقتصاد المصري واللي مكانش عادل في معظم تقارير التقييم لكن تفضل الوكالات الكبيرة عالمياً مهمة جدا في فتح الاستثمارات الأجنبية المباشرة للاقتصاد المصري لأن تقاريرها مصدقة عند المستثمرين الكبار حولين العالم وكلام فيتش الأخير هيفتح الطريق أخيرا لتعديل تصنيف مصر الائتماني لدرجة إيجابية ودي بتفرق كتير جدا في الأسواق الدولية لمصر وفي الاستثمارات وبرامج التمويل وانتقال رؤوس الأموال الضخمة لمصر 
.