ضربة المركزي اللي هتلم تعابين السوق السودا.. مفيش سعرين تاني للدولار فى مصر

فيه معركة كبيرة ومستمرة بقالها حوالى سنتين أو أكتر شوية بين البنك المركزي وتجار العملة فى السوث السودا للدولار والمعركة دي مرت بجولات كتير الفترة اللى فاتت وفيه جولات كسبها المضاربين وأباطرة الدولار وجولات أكتر كسبها البنك المركزي لكن اللى حصل من ساعات تقدر تعتبره ضربة قاضية ومميتة للسوق السودا ومش هتقومها قومة تانية فى مصر.. فيا ترى ايه اللى حصل ؟ وليه مش هيكون فى مصر تانى أكتر من سعر للدولار؟ وازاى البنك المركزي قدر يلعبها صح؟

النهاردة الصبح البنك المركزي فاجئ السواق بقرارين مهمين جدا هيكون ليهم تاثير كبير فى القضاء على السوق السودا للدولار وهينهوا تماما على المضاربين وتجار العملة القرار الأول كان السماح بتحرير سعر صرف الجنيه أمام العملات الأجنبية وفقا لآليات السوق يعنى تحرير سعر الصرف بشكل كامل واللى هيحدد سعر الدولار هو العرض والطلب وطبعا ده قرار تاريخي هيقضى على السوق السودا اللى مش هيكون فيه اى مبرر لوجودها لأن سعر الدولار فى البنك هيبقا هو نفس السعر فى اى حتة تانية

وتانى قرار خده البنك المركزي وهيكون ليه دور كبير فى القضاء على فوضى سوق الصرف هو رفع الفايدة بنسبة 6% مرة واحدة ودي أعلى زيادة فى تاريخ رفع اسعار الفايدة والهدف من القرار ده لم السيولة المتاواجدة فى السوق وكمان جذب العملاء لاستثمار مدخراتهم فى الجنيه المصري من خلال ادوات الدين الحكومية زي أذون الخزانة والسندات بالاضافة الى الشهادات مرتفعة التكلفة اللى اصدرها البنك الأهلى وبنك مصر ومدته 3 سنين بفايدة 30% ودى فايدة مرتفعة جدا وتقريبا مفيش اى نشاط استثماري ممكن يحقق الربح ده وميزة الشهادة المرة دى انها 3 سنين مش سنة واحدة زي ما كان بيحصل قبل كده.

كمان فيه تحركات مهمة تانية تمت فى الكام ساعة الأخيرة .. وفى خطوة جديدة نحو تعزيز استقرار سوق الصرف المحلى وجه البنك المركزى المصرى البنوك المحلية لفتح حدود استخدام بطاقات الائتمان بالعملة الأجنبية .. وبتأتى توجيهات المركزى فى إطار برنامج إصلاح اقتصادي شامل يجرى تطبيقه  بالتنسيق بين البنك المركزى والحكومة بدعم من الشركاء الثنائيين ومتعددي الأطراف وعقب توفير التمويل اللازم لدعم سيولة النقد الأجنبي.

طب الكلام ده كله معناه ايه ؟

معناه انه خلاص الجيم خلص والدولة قررت بشكل رسمي قتل السوق السودا للدولار وانه مش هيكون فيه تانى أكتر من سعر للعملات الأجنبية وان السعر المعلن من البنك المركزي هيكون السعر المعتمد لأى عملة وان كمان البنوك هتوفر الدولارات لأى مستثمر وللشركات والمستوردين

طب ليه مصر خدت القرارات دي دلوقتي؟

مصربالقرارت دي بتفتح آفاق جديدة لاقتصادها بتعويم الدولار والاتجاه  نحو اقتصاد مصري أكتر قدرة على المنافسة ودي هتكون  بداية حقبة جديدة من الازدهار والنمو .. لأن دي رسالة لخارج ان مصر بتضع ثقتها في قدرة اقتصادها على الصمود في مواجهة التحديات ودي  فرصة لخلق فرص عمل جديدة وتحسين مستوى المعيشة مصر تسير على خطى الدول المتقدمة بتحرير سوق الصرف