لو عاوز تعرف تأثير قرارات المركزي التاريخية.. أعرف التفاصيل من هنا
هو ايه معني تحرير سعر صرف الجنيه وفقا لاليات السوق؟ وازاي ده هيأثر على حياتنا؟ وليه البنك المركزي رفع الفايدة ٦% مرة واحدة؟ واشمعنا صندوق النقد الدولي وافق دلوقتي على زيادة القرض المقدم لمصر؟
من بعد اعلان البنك المركزي قرارته التاريخية بتحرير سعر صرف الجنيه قدام العملات الأجنبية ورفع سعر الفايدة ٦% مرة واحدة وكل الناس عاوزة تعرف وتفهم ليه المركزي تمل كده وتأثير ده ايه على الأسواق وفى الفيديو ده هنرد على كل الأسئلة اللى بتشغيل بال الناس
واول سوال .. ايه معنى قرار البنك المركزي بالسماح بتحديد سعر الصرف وفقا لاليات السوق؟
القرار ده معناه ببساطة تحرير سعر الصرف طبقاً لآليات السوق ( العرض والطلب )
وده كان مهم جداً يحصل خصوصاً بعد العملة الصعبة اللي دخلت الفترة الأخيرة من صفقة رأس الحكمة وده اللي كان عامل حاسم ان البنك المركزي يبقى مطمئن انه ياخد القرار ده دلوقتي.
طب القرار ده هيأثر علينا ازاي ؟
مبدأياً كده خلاص مفيش سوق سودا وسعرين الجنيه، هو سعر واحد هيبقى في البنك .
ثانياً كل الاستثمارات اللي كانت متعطلة بسبب تعطل اتخاذ القرار ده هتيجي دلوقتي بشكل متدفق وده معناه مزيد من النقد الأجنبي هيدخل البلد .
كمان تحويلات المصريين في الخارج هترجع تدخل تاني لان زي ما قولتلك مفيش سعرين وبالتالي الكل هيحول مباشر على البنك .
قرض صندوق النقد الأجنبي خلاص تم وبالتالي هيدينا فرصة نتحرك بشكل أفضل خلال السنتين الجايين وهيدي ثقة في الاقتصاد المصري ككل .
طيب والأسعار هتنزل ولا هتفضل مكملة في جنونها ؟
البنك المركزي زود سعر الفايدة ٦٪ عشان يلم الكاش الزيادة من السوق وبالتالي يحاصر التضخم اللي هو ارتفاع الأسعار بالإضافة الى ان البضايع اللي كانت محجوزة في الجمارك هتدخل اهي خلاص دفعة واحدة وبالتالي المعروض هيزيد بشكل كبير جداً الفترة الجاية وبالتالي الأسعار هتنخفض تدريجياً بشكل "ملحوظ" خلال الأيام الجاية على طول .
يعني القرار ده في الأساس هدفه هو السيطرة على ارتفاع الأسعار .
طب واشمعنا الصندوق وافق دلوقتي على قرض جديد لمصر؟
ببساطة لأن الشروط اللي كان طالبها استنفذت بالكامل وخد بالك الصندوق في الأول والآخر مش مؤسسة خيرية ولا بيرمي فلوسه هو عاوز يضمن تنفيذ سياسات تخلى الدولة تقدر تسدد التزاماتها وده اللي بتعملوا الحكومة في برنامج الإصلاح اللي بتنفذه بالتعاون والتنسيق مع الصندوق
