بعد خراب السوق.. خطة تجار العملة لغسل 50 مليار دولار.. مفاجأة في انتظارهم
ياترى تجار العملة واللي لموا الدولارات من السوق السوداء على مدار شهور هيعملوا ايه بالدولارات مع استمرار الحملات الأمنية وانهيار السوق وايه حكاية خطة غسل 50 مليار دولار من السوق الموازية وايه المفاجأة اللي في انتظارهم.. تفاصيل مثيرة هنعرفها في الفيديو ده خليكم معانا
سوق العملة جبرت وخربت ووقع تجار الدولار في مصيبة وورطة كبيرة لما خزنوا الدولار والعملات المضاربة بيها لما الأوضاع الاقتصادية في مصر تسوء ويتعوم الجنيه وتوقف الاستثمارات ويبقي الطلب على الدولار كبير وملهوش غير سكة واحدة لكن الحكومة قلبت الترابيزة في وشهم بعد صفقة القرن في رأس الحكمة والدولار نزل الأرض وداخل على سعر البنوك واستمرار صعود الجنيه المصري قدام العملة الأمريكية ولو فضلت الأخبار الحلوة تيجي باستثمارات جديدة مش بعيد سعر الدولار في البنوك ينزل اصلا حسب قانون العرض والطلب وخاصة مع إجراءات كتير هتنفذها الحكومة والبنك المركزي المصري الفترة الجاية زي مبادلة العملة في أسواق بريكس وبدأت فعلاً بتوقيع صفقة استيراد لحوم برازيلية ضخمة بالجنيه المصري ومع مناقشات لجدولة الديون مع عدد من الدول وتحويلها لاستثمارات وحصل ده فعلاً مع ألمانيا وإيطاليا واتحولت لمشروعات الكل فيها كسبان.
طيب ايه هيكون مصير الدولار اللي في مخازن تجار العملة وهو رقم ضخم وحسب تقديرات خبراء مصرفيين حجم التداولات في السوق السوداء وكان حوالي 50 مليار دولار وطبعا دلوقتى المليارات دي مش هقدر تدخل البنوك لأن مصادرها غير شرعية وفي نفس الوقت مش هترجع السوق السوداء للدولار لأن خلاص مفيش سوق سودا ولا بيضا يبقي هتروح فين.. احنا هنقولك تجار العملة بيفكروا ازاي عشان يتخلصوا من الدولارات المخزن عندهم بأقل قدر من الخساير.
شوف حضرتك طبيعي لما كل الطرق لتصريف الدولار الغير مشروع تتقفل وتتسد ومع الضربات الأمنية واللي بقي معاها احتفاظ التجار بالدولار خطر كبير جدا عليهم وبالتالي مفيش حل قدامهم غير انهم يحاولوا يغسلو الدولارات دي بمعني أنهم يدخلوها في أنشطة مشروعة زي تاجر عملة مثلا يعمل شركة استيراد وتصدير ويبدأ يشتغل في التجارة أو يسلمها لحد شغال في نشاط شرعي عشان يخبي الدولارات معاه ويشغلها ويكسب قصادها بالجنيه أو يشتري عقارات ومعارض ومحلات ومزارع من شركات.
لكن حتي الحل ده منفعش مع تجار العملة لأن رجالة الأموال العامة صاحيين جدا ومتوقعين تصرفات التجار وفعلا قبضت علي عدد كبير من تجار العملة في قضايا غسل أموال وصادرتها وطبعا مفيش قدام تجار العملة غير انهم يخاطروا ويحاولو تاني لكن بردوا هيلاقوا مباحث الأموال العامة قدامهم بتقولهم من اين لكم هذا وده لان الداخلية صاحية كويس جدا وعارفة مين في السوق ومين اللي دخل فيه جديد والحرب دلوقتي بقت حرب معلومات والفترة اللي فاتت كانت أجهزة الأمن بتجمع معلومات عن كل تجار العملة لأن مش هينفع يتقبض على حد من غير دليل
الحل الاخير بقي قدام تجار العملة والدولار غير انهم يستمرو في تخزين الدولار على أمل الظروف ترجع تاني لكن الحل ده معناه خساير وخراب بيوت اكتر ليهم لأن الأزمة عمرها ما هترجع زي الاول وبالعكس الحكومة اتعلمت من الدرس عشان اللي حصل ما يتكررش وخلاص زمن الدولار انتهي وولى من غير رجعة.
