سعر الدولار ممكن يوصل كام لو حصل تعويم..اعرف الدنيا رايحة على فين؟
يا ترى لو حصل تعويم ممكن سعر الدولار فى البنك يوصل لكام؟ وهل السيولة الدولارية اللى هتيجي من صندوق النقد هيكون ليها دور فى ضبط سوق صرف العملات الأجنبية ولا لأ؟ وايه المبلغ اللى ممكن مصر تحصل عليه فى برنامج التمويل الجديد؟
من بعد تراجع الدولار فى السوق السودا ونزول سعره من مستوى 70 جنيه الى حدود من 40 الى 45 جنيه واقترابه خطوة خطوة من السعر الرسمي فى البنوك وكل الناس بتسأل هو التعويم ممكن يحصل امتى ؟ ولو حصل ممكن سعر الدولار يوصل لكام ؟
ونيجي للسؤال الأول هو فيه تعويم ولا لأ؟
موضوع تحريك سعر الصرف من الموضوعات اللى الحكومة والبنك المركزي بيتعاملوا معاها بحرص شديد جداوفى وقت كل الدنيا من حوالى سنة واكتر كانت بتقول فيه تعويم وسعر الجنيه هينخفض البنك المركزي كان مصر على ان الجنيه مقيم بأقل من سعره وان اللى بيحصل فى السوق غير الرسمية لصرف العملات مش طبيعي وان السعر اللى بيباع بيه الدولار مش حقيقي ولكنه نتيجة للمضاربات على العملة الأمريكية واستغلال لأزمة نقص العملة وعشان كده مصر رفضت كل الضغوط اللى اتمارست عليه لتحريك سعر الصرف وفضل الدولار فى البنوك مستقر عندمستوى ال 31 جنيه
لكن حاليا فيه متغيرات كتير حصلت ممكن تخلى الحكومة والبنك المركزي يعيدوا التفكير فى سعر الصرف واهم متغير هو توافر سيولة دولارية كبيرة سواءمن صفقة راس الحكمة اللى وفرت 35 مليار دولار او من صندوق النقد اللى من المتوقع يعلن عن زيادة قيمة التمويل المقدم لمصر من 3 الى ما بين 10 و12 مليار دولار بالاضافة الى بعض الاستثمارات الأجنبية المباشرة اللى هيتم الاعلان عنها الأيام الجاية
وطبعا ده خلا سعر دولار السوق السودا ينهار بشكل واضح ويوصل لمستويات قريبة جدا من سعر الدولار الرسمس فى البنوك ودي فرصة عظيمة لو الحكومة عندها نية لتحرير سعر الصرف ومش هتلاقي وقت أفضل من كده عشان تاخد القرار الصعب بتخفيض قيمة الجنيه للمرة الرابعة خلال اقل من سنتين
طب لو التعويم حصل سعر الدولار هيوصل لكام فى البنوك ؟
الحقيقة السؤال ده شاغل تقريبا كل مؤسسات التمويل الدولية وبنوك الاستثمار ومراكز الأبحاث وكل التقارير اللى طالعة من المؤسسات دي كلها بتقول ان سعر الدولار بعد التعويم هيتاراوح ما بين 40 الى 45 جنيه والتوقعات ماشية فى سكة ان خفض قيمة الجنيه هيحصل قبل نهاية الربع الأول من 2024 يعنى قبل نهاية شهر مارس الجاري
