هبوط أسعار 23 سلعة في الأسواق.. شوف نزلت قد إيه

  
توفر الدولار في البنوك، كان له اثار ايجابية علي الاقتصاد المصري وخصوصا الاسعار واللي نزلت بشكل كبير في الاسواق، وبدأ المواطن المصري يحث بتبعات الصفقة الكبيرة اللي عملتها الحكومة في رأس الحكمة في معاملاته اليومية في الشراء... يا تري الاسعار نزلت عندنا لكام.. واية هيا اهم الحاجات اللي سعرها انخفض
 

نشاط السوق السودا في الشهور اللي فاتت بسبب نقص العملات الاجنبية اللي كانت بتعاني منه مصر علي مدار الشهور اللي فاتت، ادي الي ارتفاع اسعار كل السلع التموينية والاساسية اللي بيحتاجها كل بيت مصري، والمواطن حس في فترة من الفترات ان الحكومة سابت التجار تنهش في لحمهم ولا في رقابة ولا اي حاجة علي الاسعار وده اللي خلي الناس ثارت علي الدكتور علي مصيلحي وزير التموين في افتتاح معرض اهلا رمضان بشبرا، والجهات الامنية خرجته من وسط الناس هناك باعجوبة، ولولا وجود كانت هيحصل ما لا يحمد عقابه.
الحكومة عارفة ان حل كل حاجة في البلد دي واقف علي قتل نشاط السوق السودا، وده اللي حصل مع بدء دخول 10 مليار دولار من ايرادات صفقة الإستثمار السياحي في رأس الحكمة، واللي كانت المسمار الاخيرة في نعش السوق السودا، وتبعها بشكل تدريجي انخفاض اغلب السلع في الاسواق، وبدأت الأمور ترجع مرة ثانية لشكلها الطبيعي .
طيب اية اللي حصل في اسعار السلع بعد صفقة رأس الحكمة؟.
بعد وصول ايرادات رأس الحكمة بدأ الدولار اللي لازم للتجار والموردين يكون متوفر في البنك المركزي، وبالتالي بدأ الضغط علي السوق السودا لتجارة العملة يقل ويختفي تماما مع مرور الايام، وده انعكس علي اسعار السلع خصوصا ان التجار بقي متوفر قدامهم الدولار اللي هيشتروا بيه السلع ويبيعها باسعارها الحقيقية .
طيب اية هيا السلع اللي اسعارها انخفضت في الاسواق؟.
اغلب السلع الموجودة حاليا في الاسواق سعرها انخفض بما يقرب من 30%، ووصلت التخفيضات لأكتر من 23 سلعة وتراجع اسعارالأرز بنسبة 34%، وسجل متوسط سعر الكيلو 35.68 جنيه، والارز السايب تراجع بنسبة 1.07%،وسجل متوسط سعر الكيلو 32.33 جنيه، وكمان تراجع سعر الجبن الأبيض بنسبة 0.49%، وسجل متوسط سعر الكيلو 136.56 جنيه،ده غير اسعار الجبنة الرومي واللي تراجعت بنسبة 0.14%،وسجل متوسط سعر الكيلو 254.52 جنيه.

انهيار السوق السودا، كان له تاثير كبير علي اسعار المسلي والزيوت خصوصا اننا نستورد نسبة كبيرة منهم من الخارج، وتراجعت سعر المسلى الصناعي بنسبة 3.84%، وسجل متوسط سعر الكيلو 103.82 جنيه، وتراجع سعر المسلى البلدي بنسبة 2.12%، وسجل متوسط سعر الكيلو 296.74 جنيه، وكمان الجبنة الشيدر انخفض سعرها بنسبة 3.12%، وسجل متوسط سعر الكيلو 241.07 جنيه.

ومن الالبان والسلع التموينية بنروح معاكم لأسعار الحديد والاسمنت بالأسواق، وتراجع حديد عز بنسبة 0.49%، وسجل متوسط سعر الطن 53.295 ألف جنة، و تراجع سعر الأسمنت بسنبة 2.11%،وسجل متوسط سعر الطن 2319 جنيه.
ولسه مكلمين مع حضراتكم في جولتنا عن السلع اللي اسعارها انخفضت بعد بدء وصول تحويلات صفقة رأس الحكمة ونروح لأسعار الخضروات وانخفض سعر البطاطس بنسبة 1%، وسجل متوسط سعر الكيلو 15 جنيهاً، وتراجع سعر الليمون البلدي بنسبة 2.1%، وسجل متوسط سعر الكيلو 23.79 جنية، وكمان  تراجع سعر الفلفل الرومي بنسبة 1.44%، سجل متوسط سعر الكيلو 15.79 جنيه، جه غير اسعار الخيار واللي تراجعت بنسبة 0.28%، وسجل متوسط سعر الكيلو 14.29 جنيه، وتراجعت اسعار البسلة بنسبة 0.52%، وسجل متوسط سعر الكيلو 28.94 جنيه، واخيرا اسعار الباذنجان واللي تراجعت بنسبة 0.96%، وسجل متوسط سعر الكيلو 12.4 جنيه.