مش هتدخلها غير بجواز سفر.. الإمارات تحسم الجدل في ملكية رأس الحكمة

ياترى لسه فيه تفاصيل تحت الترابيزة في صفقة رأس الحكمة بعد كل اللي اتقال من الحكومة المصرية.. أيوا لسه فيه كلام.. تعالو نشوف الجديد
 

منذ الإعلان عن صفقة رأس الحكمة الضخمة والمليارات اللي جاية وإنها أكبر صفقة استثمارية في تاريخ مصر كله و كتر الكلام وزاد إن مصر باعت أرضها وإنه مش هيكون ليها السيادة على المنطقة وإن أي مصري عاوز يزرو راس الحكمة ياخد جواز السفر المصري معاه.

طبعا قلنا وحللنا كتير إن كل اللي بيتقال عن السيادة المصرية لرأس الحكمة تخاريف وناس عقولها مغيبة لأن مفيش شبر في مصر مش تحت السيادة الوطنية ورغم إن الدكتور مصطفي مدبولي طلع وقال كل التفاصيل عن المشروع وانه مشاركة مش بيع وإن الحكومة المصرية ليها 35% من أرباح المشروع مدى الحياة لكن تقول إيه في ناس مش فاضية غير للإثارة ونشر الأكاذيب والقصص والحكايات.

الملياردير الإماراتي خلف الحبتور، وده شخصية مقربة من السلطات في الإمارات الراجل طلع واتكلم عن السيادة المصرية على  مشروع مدينة رأس الحكمة، والراجل اتكلم بعد الجدل الكبير اللي حصل في مصر واستغرب إزاي الناس اللي بتقول إن مصر ملهاش سيادة على المنطقة أو المدينة متعرفش ألف باء استثمار وقال الحبتور إن المدينة ملك المصريين وهتفضل أرض المصرية ومحدش هينقلها من مكانها.

واتكلم الحبتور على  علاقة مصر والإمارات وإنها قوية من القدم، ويجب على الأشقاء يقفوا إلى جوار بعضهم البعض وإن أي أكاذيب أو مغالطات بتتقال الهدف منها على طول ضرب إسفين في العلاقة بين البلدين وإن الإمارات حكومة وشعبا قلبها مع مصر، وصفقة رأس الحكمة بتؤكد العلاقة النظيفة والواضحة بين مصر والإمارات.
خلص كلام الملياردير الإماراتي لكن هتفضل نفس الحالة من التشكيك في الصفقة لأن اللي بيهاجمها هدفه اثارة الفوضي وتشويه المشروع وتشويه انجاز الرئيس والحكومة لأهم صفقة غيرت مصير الاقتصاد المصري كله وحررته من حصار الدولار والسوق السودا وأهل الشر ورجعت الثقة في الأسواق من جديد وكانت فاتحة خير لصفقات تانية ضخمة في الطريق وهيتم الإعلان الرسمي عنها قريب جيدا.