ايه حكاية الصفقة الإيطالية والمشروع الخطير

 
ياتري ايه قصة الصفقة الإيطالية الجديدة في مصر وليه جت دلوقتي وازاي رأس الحكمة فتحت بوابة الاستثمار الكبيرة قي في مصر.. تعالوا نشوف مع بعض .

الحقيقة من ساعة الإعلان عن صفقة رأس الحكمة والمبلغ الضخم المدفوع فيها والمصريين كل شوية يسمعوا عن صفقات واستثمارات بتتوقع بالفعل على الورق وبيتتنفذ على الأرض وكل الصفقات دي جت في عز الشدة اللي فيها البلد وزي ما بيقول المصريين ماضاقت الاغلما فرجت والحقيقة كل الأزمات بدأت تتفكك من ساعة الانفراجة الكبيرة في الدولار بعد الصفقة الإماراتية وشفنا ازاي الأسعار بدأت تنزل والأسواق تهدى والغلاء يوقف..
الاستثمار زي ما بيقولوا بيحب بعضه وده لان بعد صفقة رأس الحكمة بدأت المليارات تهل على مصر من أماكن تانية كتير وشفنا الدكتور مصطفى مدبولي وهو بيوقع امبارح اتفاقيات لمشروعات ب40 مليار دولار على 10 سنين في مجال الطاقة النظيفة والمشروعات الخضراء وطالما كان فيه ورق وتوقيع يبقي فيه تنفيذ على طول للمشروعات.
لكن الحقيقة بعد  رأس الحكمة فيه حاجة مهمة حصلت محدش خد باله منها وهي مؤشر مهم جدا وهو المشروع الايطالي العملاق اللي قدمته شركة إيطالية في الساعات الأخيرة .. الشركة الإيطالية اسمها «دانيللي» وقدمت مقترح  لانشاء مجمع صناعي متكامل لمنتجات الحديد والصلب المتطورة باستثمارات تصل إلى 4 مليارات دولار واخد بال حضرتك من الرقم قد ايه يعني اكتر من قرض صندوق النقد الدولي اللي بنتفاوض عليه من سنتين.
المهم بيان مجلس الوزراء  قال ان إنشاء المجمع بيهدف إلى توطين صناعة الحديد المتطورة، وتصدير منتجات الحديد والصلب للأسواق العالمية وخاصة السوق الأوروبية مش كده وبس ده كمان مشروع الحديد والصلب بيهدف لجذب المستثمرين لإنشاء مصنع لإنتاج الهيدروجين الأخضر باستثمارات تقدر بقيمة تتراوح ما بين مليارين إلى 3 مليارات دولار يعني بنتكلم في مشروعين بس ب7 مليار دولار لكن الأهم في قصة المشروع الايطالي أنه بيوطن صناعة استراتيجية في مصر وهي صناعة الحديد والصلب لأنها صناعة بتقوم عليها صناعات تانية كتير ومش حجم المبالغ نقدر نعرف حجم المشروع عامل ازاي ودي كلها مؤشرات قوية على أن السوق المصري تجاوز أزمة الدولار وإن الاستثمارات بدأت تهل .