ايه حكاية شهادات استثمار بفائدة 40% في البنوك وليه عملت أزمة
إيه اللي حصل في البنوك في الساعات الأخيرة وايه سر المكالمات الكتيرة اللي جت لخدمة العملا وايه حكاية شهادات الـ 40% اللي قالبة مصر وليه حصل عليها جدل كبير.. تعالوا نشوف الحكاية مع بعض.
معروف إن البنوك المصرية بتطرح شهادات ادخار بفايدة كبيرة عشان تجذب العملا للاستثمار في البنوك بعيدا عن الأسواق الغير شرعية من ناحية ومن ناحية تانية عشان تلم السيولة اللي في السوق وتقلل الاستهلاك والتضخم في الأسواق وغير كده الشهادات اللي بفايدة كبيرة مش بتكون الحل المثالي للبنوك لأن هامش ربحها فيها بيكون قليل لكن بتعمل كده عشان تظبط السوق وعشان مسؤولياتها الوطنية وعشان كده بردوا اللي بيطرح الشهادات الادخار عالية الفائدة بتكون البنوك الحكومية..
وزي ما إحنا عارفين في ذروة توحش السوق السوداء للدولار بنك مصر والبنك الأهلي المصري أعلنوا عن طرح شهادات جديدة من فترة بعائد كبير وصل 27% مرة واحدة وده عشان المركزي يقدر يواجه السوق السوداء ويضربها تحت الحزام لأن ناس كتير كانت بتتعامل مع السوق السوداء للدولار قررت تستثمر في الشهادات الجديدة لأكتر من سبب أولها إن الاستثمار في السوق امان ومفيهوش مخاطرة زي الإتجار في العملة وده غير انتشار الدولار المزور وعمليات النصب في السوق الموازية وقدرت البنوك بالشهادات الجديدة تجمع حصيلة ضخمة من الأموال..
طيب ايه اللي حصل في الساعات الأخيرة.. شوف حضرتك في الكام ساعة الأخيرة ظهر كلام إن البنوك أصدرت شهادة جديد. بفائدة 40% مرة واحدة ومن ساعتها تليفونات خدمة العملاء ما بطلتش رن من ناس عاوزة تستفسر عن الشهادة الجديدة واللي بعائد غير مسبوق وغير منطقي في نفس الوقت لانك لو حطيت مليون جنيه هتاخدهم مليون و400 ألف جنيه ودا طبعا فائدة ضخمة ومش منطقية من البنوك لان كده البنوك تخسر طبعا أو مش هتكسب حاجة لأن مفيش اي استثمار يجيب الأرباح دي حتي لو في البنوك.
المهم لما الكلام بقي ترند عن شهادة ال40% طلع المصرفي محمد الإتربي، رئيس اتحاد بنوك مصر وحسن الجدل عن حقيقة إصدار 5 بنوك شهادات استثمار بفايدة 40 %، وقال الاتربي إن الكلام ده مش صحيح بالمرةوكلها إشاعات تروج في السوق.
وقال الاتربي إن أعلى شهادة استثمار موجودة بالسوق في الوقت الحالي هي التي بيصدرها بنك مصر والبنك الأهلي بعائد سنوي 27%، واللي صدروا كمان بدافع وطني لمواجهة الفوضى في سوق الصرف زي ما قلنا. والراجل قال إن البنوك بتفقد جزء من أرباح البنوك اللي بتصدر الشهادات عالية الفايدة، لكن بنك مصر والأهلي والبنوك الحكومية عامة عليها دور وطني ومسؤولية وفي السنة اللي فاتت مثلا بنك مصر حقق أرباح 25 مليار جنيه في سنة واحدة رغم الأزمات..
