خلال 48 ساعة.. هبوط حاد في سوق الأجهزة الكهربائية
صفقة رأس الحكمة السحرية واللي جت في وقتها قدرت تقلب حال الاسواق وتضرب تجار الازمات وترجع هيبة الجنيه المصري من تاني..
دلوقتي أسواق كتير بدأت ترجع شوية شوية لطبيعتها بعيد عن الاستغلال والمضاربة والاحتكار بعد ما سقوط وانهيار دولار السوق السودا وده بعد ساعات قليلة من إعلان تفاصيل الصفقة اللي جابت شلل لتجار العملة.
شفنا إزاي سوق الدهب رجع يستقر تاني ونزلت الأسعار والنهاردة الكلام عن انفراجة في سوق السيارات واللي فيه توقعات بتقول إنها هتنزل 20% مرة واحدة وبعدها انخفاضات تانية.
نروح لسوق الأجهزة المنزلية والكهربائية ودا من أهم الأسواق في مصر لأنه كل المصريين بيتعاملوا معاه والشرا والبيع فيه مش بيتوقف والحقيقة السوق كان شبه راكد الفترة اللي عدت بسبب الزيادات الخرافية.. لكن دلوقتي الوضع هيتغير وبدأت فعلا مؤشرات هبوط الاسعار بقوة في سوق الأجهزة الكهربائية وحسب شريف صلاح، نائب شعبة الأجهزة الكهربائية بالاتحاد العام للغرف التجارية، فيه بعض الشركات اللي بتستورد الأجهزة الكهربائية فقط، هي اللي بادرت بخفض الأسعار في الوقت الحالي، وخلال يومين بداية من بكرة الأربعاء هتنزل الأسعار بشكل رسمي.
وعلى عهدة الشعبة السوق المحلية بدأت السوق تشهد حالة من التراجع في الأسعار ببعض الشركات، متأثرة بالانخفاض الكبير في سعر الدولار بالسوق السوداء بعد صفقة رأس الحكمة، وإن التراجع الحقيقي في الأسعار المستهلك هيشعر بيه خلال 15 يوم على الأقل من دلوقتي.
