حيتان البن في مصر... ثروات من فنجان قهوة

فنجان قهوة على الصبح أو قبل الشغل كانت كافية تعدل مزاج المصريين لكن للأسف حتى فنجان القهوة بقي عزيز وغالي بعد قرب كيلو البن عن ألف جنيه بعد ما وصل كيلو المحوج النهاردة 940 جنيه..
جايز تقول القهوة شيء ترفيهي وممكن الناس تستغني عنها لكن ده مش حقيقي لأن أي سلعة في مصر بيكون وراها صناعة كبيرة جدا والاف الشباب اللي شغالين فيها وفاتحين بيوت منها والبن والقهوة في مصر ليهم اهتمام كبير جدا ومن الأساسيات لناس كتير.

نرجع للأسعار وهل هي حقيقية ولا مبالغ فيها.. خبرء السوق قالو احكمة مهمة وهي إن أي أزمة هتلاقي المستفيد منها وفي أزمة البن أكيد تجار المزاج البني بيستفادوا والزيادة دي مش هي الحقيقية رغم إن مصر بتستورد كل البن عشان مش بيتزرع عندنا وتجار كتير لقيوها فرصة عشان يبالغوا شوية في الأسعار ويضاعفو مكاسبهم ولما تسأل يقولك الدولار زاد في السوق زي ما حصل في أسواق كتيرة قبل كده.
شعبة البن اتكلمت على الارتفاع الجنوني في أسعار البن ووصوله إلى 950 جنيه للكيلو، واعترفت إن فيه أزمة عالمية في محصول البن بسبب المناخ لكن رجعت وقالت إن الزيادات الكبيرة في البن بالسوق المصري سببها حاجتين أولها زيادة في مصاريف الشحن والموانئ والتأمينات والنقل ومبالغة كتير من التجار في رفع الأسعار طمعا في مكسب سريع.