هدوء يسبق العاصفة.. ليه البنك المركزي ما اتحركش لحد دلوقتي؟

يا ترى ليه البنك المركزي ما اتحركش لحد دلوقتى فى ملفات مهمة زي سعر الصرف وطرح شهادات دولارية؟ وازاى البنك هيحل أزمة نقص العملة الأجنبية اللى بتعانى منها مصر بقالها فترة طويلة؟ وهيعمل ايه فى التراجع الحاد فى روافد الدولار زي قناة السويس وتحويلات المصريين فى الخارج؟ والأزمة دي ممكن تخلص امتى ؟

حرفيا مصر بتعيش واحدة من أخطر أزماتها الاقتصادية فى اخر 100 سنة ويمكن محصلش قبل كده ابدا ان مصر مرت بظروف اقتصادية صعبة زي اللى بنعيشها اليومين دول.. دي مش مبالغة ولا محاولة تضخيم للأحداث .. لا دي حقيقة على أرض الواقع بيعانى بسببها الناس فى مصر بشكل يومي وكلنما شايفين الأسعار عاملة ايه فى الناس وازاى السلعة بنشتريها حالا بتمن وبعد ساعتين تلاتة ممكن بسعر تانى خالص.

طب ايه اللى وصل الامور للوضع ده ؟

لازم نكون عارفين ان مصر من مارس 2022 ولحد دلوقتى بتعانى من أزمة حادة فى نقص العملة الأجنبية وشح الدولار والفجوة التمويلية فى الموازنة العامة بتزيد كل يوم عن اليوم اللى قبله وطبعا نقص فى الدولار معناه ارتفاع فى اسعاره وكلنا شفنا ازاى سعر العملة الامريكية وصل الى اكتر من 70 جنيه فى السوق السودا وارتفع سعر الدولار معناه ارتفاع اسعار كل السلع تقريبا لأن مصر بتستورد اكتر من 80% من احتياجاتها من الخارج وده بيعمل ضغط على الاحتياطي النقدي من العملات الأجنبية وبيخلى البنوك ما تقدرش توفر عملة صعبة للمستوردين اللى بدورهم بيحاولوا يوفروا الدولار بأى طريقة فيلجأوا للسوق السودا ونخش بقا فى دايرة مغلقة

وايه سبب أزمة نقص الدولار فى مصر ؟

زي ما كلنا عارفين العملة المريكية هى عملة التجارة فى العالم كله وعشان تشترى اى حاجة من بره لازم تدفع بالدولار ومصر مواردها من الدولار محدودة جدا يعنى هي السياحة وقناة السويس وتحويلات المصريين فى الخارج والصادرات وللأسف كل مصادر مصر من الدولار فيها مشاكل كبيرة وتراجعت الفترة اللى فاتت زي مثلا تحويلات العاملين فى الخارج اللى وفقا لأرقام رسمية تراجعت باكتر من 30% وان كان الرقم على ارض الواقع اكتر من كده بكتير لأن مفيش حد هيبعت دولاراته على البنك ويبيعه ب 30 جنيه وهو بيتباع بأكتر من الضعف فى السوق السودا

والحكومة والبنك المركزي هيتصرفوا ازاى فى الملف ده ؟

البنك المركزي بيحاول بكل الطرق القضاء على السوق السودا وتوفير الدولار للشركات والمستوردين بس المعركة مش سهلة ابدا لأن زي ما قولنا مصادر مصر من الدولار ضعيفة جدا والبنك المركزي اخره يحط سياسات نقدية ويتعامل مع التحديات اللى بتواجهوا واهمها طبعا العمل على حلول لتراجع تحويلات المصريين المصدر الأكبر للنقد الأجنبي والمركزي  بيدرس حاليا اطلاق مجموعة منتجات لجذب المصريين فى الخارج هتكون فيها شهادات استثمار دولارية بفايدة مرتفعة جدا بالاضافة لمميزات تانية كتير

والبنك المركزي حاليا فى مرحلة هدوء ما قبل العاصفة لأن مش هيحصل تحريك لسعر الصرف الا بشرط توافر غطاء دولاري وسيولة دجولارية تقدر تمكن البمنك المركزي انه يكون مسيطر على الوضع وان الدولار ما يخرجش عن السيطرة لو حصل تحريك فى سعر الصرف