تسقيع الدولار.. السوق السودا دخلت التلاجة ولعبة المركزي نجحت

معاك دولار خزنه واوعي تبيع .. ايه اللي بيدور في السوق السودا للدولار وإزاي التجار وقعوا في فخ البنك المركزي المصري وايه اللي هيحصل في الأيام الجاية.. كل ده هنعرفه مع حضراتكم في الفيديو ده 
 

من ساعة الدولار ما نزل حوالي 14 جنيه من اخر ارتفاع ليه ووصل 55 جنيه من 73 جنيه هو أعلى سعر وصله وبعدها رفع ل60 و63 جنيه وهو ما رفعش تاني ودي حاجة مش منطقية خالص لأن مفيش حاجه اتغيرت يعني مثلا المركزي المصري ما عومش الجنيه أو رفع سعر الدولار في البنوك أو مثلا التجار شبعوا في السوق السودا وده بيقول إن فيه حاجة مش طبيعية بتحصل في السوق الموازية للدولار.. وإذا عرف السبب بطل العجب والحقيقة فيه اسباب كتير مش سبب واحد أولها أن أغلب التجار قرروا يسقعوا الدولار أو يخزنوه لأسباب كتير بردوا منها الحملات الأمنية وسقوط تجار كتير جدا في قبضة الداخلية والنتيجة تجار كتير قررت توقف نشاطها.

تاني الأسباب لركود دولار السوق السودا هو انتشار حالات تزوير الدولار بشكل كبير جدا ودا ظهر من الاخبار اللي جاية من السوق نفسها وإن فيه صفقات كتير تمت بس طلعت صفقات مضروبة وطبعا صحابها معرفوش يبلغوا ولا يعملوا محضر بتعرضهم للنصب عشان نشاطهم في الأساس مش شرعي وبيعاقب عليه القانون..

كمان فيه سبب مهم جدا جدا لسقوط دولار السوق الموازية وهو إن زباين السوق واللي دخلوا يضاربوا على الأسعار واللي بيخزنوا الدولار حسوا كده إن الأزمة اصلا هتتحل قريب وإن رغم استمرار الأزمة لكن فيه تحسن كبير عن الأول وده بعد من الدولة والبنك المركزي قدروا يديروا ملف الدولار كويس وكل الاخبار اللي جاية دلوقتي إيجابية سواء من صندوق النقد أو ترشيد الاستيراد وفي المقابل ارتفعت أرقام الاستثمار وأنباء الصفقات الضخمة جدا بتم في السوق المصري منها استثمارات رأس الحكمة واللي هيدخل في اكتر من 40 مليار دولار استثمارات ومشروعات بناء شرم الشيخ جديدة في منطقة اسمها راس جميلة بجنوب سيناء .
نيجي بقي لحيلة البنك المركزي واللي قدر يحاصر السوق السودا للدولار بخطة بسيطة خالص وهو إنه ساب السوق الموازية تاكل في بعضها زي النار وفي نفس الوقت كان بيجفف مواردها بالتزامن مع انطلاق حملات الأمن ولغاية ما الدولار في السوق السودا بقي شحيح بسبب الخوف من الحبس ومصادرة كل الأموال زي ما بيقول القانون.