علامات على قرب زوال كابوس السوق السوداء للدولار
سنتين تقريبا ومصر بتعاني من أزمات اقتصادية شديدة وتحديداً من ساعة الأزمة الروسية الأوكرانية وكان اصعبهم 2023 واول شهرين في 2024.. ولأن لكل أزمة نهاية ايه هي علامات قرب ساعة نهاية السوق الموازية للدولار وليه قربت وايه اللي هيحصل الأيام الجاية.. كل ده هنعرفه في الفيديو ده خليكم معانا للآخر
اي أزمة في الدنيا حتى لو أزمات شخصية بتمر باكتر من مرحلة أولها ظهور المشكلة وبعدها مرحلة تفاقم المشكلة وبعدها مرحلة وصول المشكلة لذروتها وبعدين تيجي مرحلة هدوء الأزمة واخيرا مرحلة انتهاء الأزمة أو المشكلة وده لأن مفيش أزمات بتستمر للأبد لكن بتاخد دورتها الطبيعية وكل دول العالم مرت بأزمات عاصفة وقدرت تعدي منها وعندنا أوضح مثال على ألمانيا واليابان واللي طلعوا من الحرب العالمية التانية مدمرين تماما ومعظم مدنهم اتسوت بالأرض ودلوقتي من أكبر اقتصادات العالم ومصر زي اي دولة بتمر بأزمة..
وفي أزمة الدولار المشكلة مرت في دايرتها الطبيعية بداية من ظهورها ثم تفاقمها وبعدها وصولها الذروة بعد ما تخطي الدولار 73 جنيه ودلوقتي وصلت الأزمة لمرحلة الهدوء ومنحني الهبوط ونزل الدولار ل63 جنيه وتوقعات بوصوله لمرحلة الحل النهائي بهبوطه اكتر من كده لغاية ما يستقر عند سعر عادل ومعاها هتنتهي السوق السودا والمضاربات والتلاعب .
طيب ايه هي علامات قرب انتهاء شح الدولار والسوق الموازية للعملة.. لو بصينا على السوق بشكل شامل هنلاقي بوادر انتهاء الأزمة أولها نزول سعر الدولار من منطقة الذروة لأقل منها بكتير ولو بصينا كويس هنلاقي إن اللي بيحصل في السوق السودا بيقول إن الأمور فيها ماشية للاسوأ وتجار العملة عايشين في حالة ترقب ورعب بعد سقوط عدد كبير منهم في يد الأمن المصري ووصول الأجهزة الأمنية لشبكات وعصابات كتير وبقي عندها معلومات اكتر عن عصابات تانية لسه هتوقع وده مع توجيهات عليا ببذل وتكثيف الحملات على تجار العملة يعني المرة دي في إصرار على ملاحقة كل اللي بيتاجر في الدولار وده غير أن السوق نفسها بقي فيها ظواهر غريبة زي انتشار عمليات تزوير الدولار والنصب بشكل واسع جداً خلى تجار كتير يبتعدوا عنها وفي نفس الوقت المركزي استغل حالة الرعب دي وخلى بنوك تطرح شهادات ادخار جديدة وبفايدة قياسية وصلت 30% مرة واحدة عشان تغري حائزي الدولار للاستثمار في البنوك وفي سوق آمنة ومربحة.
كمان من علامات قرب انتهاء أزمة الدولار الانتهاء تقريبا من مفاوضات صندوق النقد الدولي والوصول لاتفاق بقرض كبير ودي شهادة ثقة في الاقتصاد المصري هتفتح المجال لتعديل تصنيف مصر الائتماني عالميا.. لكن من اكتر العلامات على اقتراب انزياح كابوس السوق السوداء للدولار هو صفقات الاستثمار الأخيرة اللي الدولة أعلنت عنها في مشروعات ضخمة زي مشروع رأس الحكمة واللي بتتخطي استثماراته الإجمالية 43 مليار دولار حسب تصريح رئيس هيئة الاستثمار وكمان مشروع تاني ضخم وهو مشروع رأس جميلة وهو مشروع يوازي مشروع شرم الشيخ بكل حجمه وده غير علامات تانية كتير بتقول إن أزمة الدولار في طريقها للزوال.
