رئيس تاسع أكبر اقتصاد في العالم في مصر.. سر زيارات الكبار للقاهرة

 

هي ليه القاهره بقت قبلة لرؤساء العالم في الفترة الأخيرة ورغم كل الأزمات اللي في العالم رؤوساء مهمين بيجوا القاهرة... وليه رئيس البرازيل وصل القاهرة بعد ساعات من زيارة الرئيس التركي اردوغان.. تفاصيل كتير هنعرفها مع بعض.

خلينا نقول في البداية ياجماعة إن زيارات الرؤساء للخارج مش بتكون عفوية كده ولا عشوائية ولا الرئيس يطلع في رأسه أنا هروح امريكا او روسيا او الهند دلوقتي وشغلوا الطيارة الموضوع مش كده الخالص لأن الزيارات السياسية لرؤساء الدول بتكون أصعب من كده بكتير وبيتم التجهيز ليها وحط مواعيد قبلها بسنة مثلا لأنها بتكون محكومة بمواعيد الرئيسين أو الرئيس والملك أو الرئيس الزائر والرئيس الضيف وميحصلش تضارب في الزيارة وكمان بتكون ليها هدف وجدول أعمال وتحضيرات وحاجات كبيرة جدا وأهم حاجة في زيارات الرؤساء أو الملوك للخارج انها تكون ليه فايدة يعني الرئيس مش هيسيب بلده ومشاغله ويروح دولة تانية عشان يسلم ويتصور ويتعزف له السلام الوطني.. طبعا لأ.. بيكون فيه اتفاقيات بتتوقع أو بيتم الإتفاق على شيء أو تنظيم المواقف في القضايا التانية أو تطوير التعاون الاقتصادي وكل القطاعات التانية والتنسيق في القضايا الدولية وغيرها وغيرها.
عشان كده لما جي الرئيس التركي اردوغان امبارح مصر عمل مباحثات مهمة رجعت تركيا للمنطقة وفي نفس الوقت وقع مع مصر اتفاقيات مهمة جدا ومنها تفعيل لجنة التعاون الاستراتيجي بين البلدين يعني فيه استفادة كبيرة للدولتين وتركيا زي ما احنا عارفين مش قليلة في أوروبا والمنطقة ومن أكبر أعضاء حلف الناتو ومن بين مجموعة العشرين الكبري والتعاون مع الدول الكبيرة اقتصاديا بيكون مفيد جدا  على كل المستويات وفتح الأسواق والاستثمار.
من تركيا للبرازيل وبعد أردوغان استقبلت القاهرة النهاردة  لولا دا سيلفا رئيس البرازيل، في زيارة رسمية للقاهرة وهيقابل فيها الرئيس السيسي طبعات وعدد من المسؤولين وهيزور مقر جامعة الدول العربية خلال جولة إفريقية تشمل لتعزيز الأجندة الدولية للبرازيل مع الدول الإفريقية.. طبعا  زيارة رئيس البرازيل مش هينة ومهمة جدا لأسباب كتير أولها قوة البرازيل الاقتصادية وتعالو نشوف ترتيبها.. بتقول أرقام البنك الدولي أن اقتصاد البرازيل هو الأكبر والتضخم في أميركا اللاتينية ومنطقة البحر الكاريبي، وهو اقتصاد بيقوم على مجموعة متنوعة من القطاعات، في مقدمتها الخدمات والزراعة واللي بتعتبر مصدر للدخل وفرص العمل والنقد الأجنبي في البلاد.

وحسب  تقديرات صندوق النقد الدولي لسنة 2023، يعتبر الاقتصاد البرازيلي التاسع عالمياً من حيث الناتج المحلي  واللي بيوصل إلى 2.13 تريليون دولار متفوقاً على روسيا وكندا... وكمان البرازيل عضو مؤسس في تكتل بريكس واللي انضمت له مصر رسميا الشهر اللي فات وبقت عضو رسمي وكلنا عارفين قصة البريكس والتجمع الاقتصادي الضخم اللي بتمثله الدول الأعضاء فيه وازاي مصر محتاجة مميزات البريكس عشان تنطلق اقتصاديا وتخلص من أزماتها الحالية واكيد زيارة رئيس البرازيل هيكون ليها نتايج عظيمة وكمان مصر مستورد أساسي للحبوب والمنتجات الزراعية البرازيلية وتاني أكبر مستورد للحوم البرازيلي في العالم ويعني فيه أرضية تعاون كبيرة اصلا بين مصر والبرازيل وممكن توسع بشكل يوفر كل احتياجات السوق المصري  وغالبا وحسب التسريبات هيتم اعتماد  خطوط جديدة لاستيراد اللحوم البرازيلية لمصر  وافتتاح خط طيران مباشر بين القاهرة والبرازيل ودا هيكون ليه تأثير كبير جدا في تعزيز التعاون.